"Traballaremos na defensa do proxecto nacionalista e no fortalecemento do BNG na comarca"
Eva Vilaverde, concelleira en Moraña e actual deputada provincial, vén de ser elixida por unanimidade como nova Responsábel Comarcal. Como vicerresponsábel, foi elixido Manu Lourenzo, portavoz municipal do BNG en Soutomaior.
A renovación do Consello Comarcal deu relevo ao traballo realizado por Anxos Riveiro e Xosé Manuel F. Abraldes e configurou unha nova equipa coa que seguir apuntalando a estrutura organizativa do nacionalismo na comarca. A nova responsable comarcal, Eva Vilaverde, asegura ante este novo reto que esperamos continuar coa liña de traballo desenvolvida ata o de agora e adaptala aos tempos cambiantes que nos tocou vivir, para que os proxectos nacionalistas desta comarca sigan sendo un referente político no resto do país.
Manu Lourenzo, Demetrio Gómez e Luís Bará incorpóranse ao Consello Nacional
A liña de traballo definida pola nova equipa fundaméntase en catro obxectivos principais:
- Reafirmar, estender e clarificar o discurso nacionalista e os principios ideolóxicos do BNG desde a súa base.
- Reforzar a estrutura da organización.
- Acrecentar a presenza pública ligada ao calendario e realidade socio-política de cada momento e a súa repercusión nas diferentes localidades.
- Apoiar a traballo político-institucional a realizar nos concellos, deseñando un modelo con perfil propio en cada un deles.
Trazos da nova equipa do Consello Comarcal:
- TERRITORIAL: a nova equipa é o resultado da proposta do Consello Comarcal saínte na que se respectou o criterio habitual da comarca de manter a representación do conxunto do territorio. Desta maneira garántese a participación directa das localidades na toma de decisións, a súa información inmediata das novidades organizativas e da situación de todo o territorio.
- XÉNERO: a presenza das mulleres no Consello Comarcal de Pontevedra nin é nin foi nunca unha cuestión de trámite formal. Proba diso é que unha Responsábel Comarcal dá paso a outra Responsábel Comarcal. A ampla representación de mulleres neste órgano de dirección, moitas delas tamén en importantes cargos de representación, non debe cegarnos ante a desigual realidade da muller na política e a necesidade de termos que seguir traballando no ámbito local xa que a porcentaxe de afiliación segue sen ser parella entre homes e mulleres.
- MOCIDADE: a importancia e o bo traballo realizado por Galiza Nova trasládase ao propio Consello Comarcal, no que se inclúen sete persoas membros da organización xuvenil. Isto dá mostra, primeiro de que nesta Comarca a mocidade sempre tivo o protagonismo que mereceu, participando activamente na toma de decisións. E segundo, que en Pontevedra existe un fondo compromiso entre a militancia máis nova, cun amplo grupo de traballo activo que garante un futuro saudábel da organización. Forza, ilusión e compromiso, que entroncan directamente co chamamento que fai a nova Responsable Comarcal á militancia da comarca, na dirección de continuar engrandecendo a organización cun discurso político claro de fortalecemento do proxecto nacionalista.