NO PROXECTO INVESTIRASE CASE UN MILLÓN DE EUROS
Pontevedra comeza a instalación dos medidores da calidade de aire que permitirán un control exhaustivo á hora de procurar melloras na vida da veciñanza
![](/asset/thumbnail,992,558,center,center/media/bngpontevedra/images/2024/07/12/2024071210503925754.jpg)
Pontevedra, 12 de xullo de 2024. Aínda que Pontevedra conta desde hai xa tempo que con Zonas de Baixas Emisións, que inclúen toda a cidade compacta e Monte Porreiro, o goberno municipal continúa a adoptar medidas para “seguir mellorando”.
Así, o alcalde de Pontevedra, Miguel Anxo Fernández Lores indicou que ao longo dos vindeiros meses serán instalados distintos medidores por Pontevedra, que controlarán e medirán a calidade do aire en tempo real, os 365 días do ano. En total, serán instalados seis medidores, aos que se suma o xa existente en Campolongo, tecendo toda unha rede de control do aire ao longo de toda a cidade, o que permitirá facer medicións moi precisas.
Os seis novos medidores serán instalados en Monte Porreiro, no barrio do Burgo e, en distintas zonas da cidade. No referido a estes últimos, os técnicos están agora nunha fase inicial onde van comprobando e probando cales serían as posición idóneas.
“Nun tempo contaremos cun mapa da contaminación da cidade para logo decidir a localización definitiva destes medidores”, explicou Lores. “Poranse onde os parámetros sexan peores, para poder así seguir controlando esa zona e procurar medidas que melloren a calidade de vida das persoas que alí se atopan ou que por alí pasan”.
Medirán porcentaxe de monóxico de carbono no aire, de dióxido de cárbono, de óxido de nitróxeno, o ozono troposférico, o dióxido de xofre, o dióxido de nitróxeno e compostos orgánicos tamén (COVS). Ademais, os medidores contarán cun sensor óptico para coñecer as micro particulas PM1, PM2.5 e PM10, xunto co ruído ambiental, a temperatura, a humidade relativa do aire e a presión atmosérica.
“Son uns aparatos da máis alta tecnoloxía posíbel que nos permitirán, posteriormente, tomar decisións de cara á mellorar eses parámetros, o que incidirá na calidade de vida das persoas desta cidade”, sinalou. “Todo isto é posíbel porque apostamos por ter unha cidade cunha alta calidade de vida en todos os ámbitos. A calidade do aire na cidade é boa pero cremos que temos aínda marxe para que sexa mellor”.