Pontevedra, 8 de xullo de 2026. O alcalde, Miguel Anxo Fernández Lores, visitou hoxe os traballos de renaturalización do río Gafos ao seu paso polo barrio de Campolongo en compañía dos concelleiros César Mosquera e Xaquín Moreda. O rexedor comprobou que as obras se atopan nas súas fases iniciais e avanzan ao ritmo previsto co obxectivo de devolver a vida á canle fluvial e transformar a calidade urbana da zona.

Fernández Lores explicou que os primeiros traballos sobre o terreo son máis escuros, farragosos e non teñen visibilidade, pero salientou a implicación da dirección de obra ante un proxecto de gran complexidade. "Vai ser unha obra marabillosa para Pontevedra, que vai devolverlle a vida ao río en Campolongo e que vai ser valorada positivamente por toda a cidadanía", declarou o rexedor.

A prioridade actual das obras céntrase na área situada entre os centros educativos debido á limitación de espazo e á necesidade de realizar escavacións e contencións de terras. Os traballos avanzan para que este tramo quede libre antes do inicio do curso escolar en setembro. Neste sentido, xa se iniciou a reposición do saneamento na marxe esquerda, á altura da escola infantil, e estase a executar a zapata da pasarela peonil máis grande do proxecto, que contará con 12 metros de ancho. Ademais, prepárase un acceso á piscina e ao colexio que non estaba inicialmente incluído no ámbito do proxecto, co obxectivo de que a zona quede perfectamente habilitada para o regreso ás aulas.

A previsión técnica establece que o levantamento continuo das tapas de formigón da canle comezará durante este mes de xullo neste mesmo tramo para despois continuar río arriba. Paralelamente, a finais de mes iniciarase o traslado de parte dos xogos do parque infantil de Campolongo. Os aparellos destinados aos nenos de maior idade recolocaranse máis preto da piscina e serán reparados e homologados para estar operativos en setembro, mentres que a zona infantil para os máis pequenos se manterá na localización actual.

O proxecto de renaturalización, adxudicado á Unión Temporal de Empresas (UTE) COVSA e E.C. Casas por un importe de 4.191.406,25 euros e un prazo de execución de 12 meses, actúa sobre unha superficie de 21.929,47 metros cadrados e unha lonxitude de 486,40 metros lineais de río.