Pontevedra, 19 de xuño de 2026. Pontevedra, 19 de xuño de 2026.- Pontevedra acollerá a primeira fin de semana de xullo –venres 3, sábado 4 e domingo 5 de xullo– a novena edición da Festa dos Libros, que encherá a carpa situada na praza da Ferraría de literatura, encontros arredor da lectura e propostas culturais para todos os públicos.

Organizada polo Concello de Pontevedra, a festa conta coa colaboración de trece librarías da cidade: Aviones de Papel, Clip, D-Lectum, El Naranjo, El Pueblo, Espazo Lector Nobel, La Nube de Papel, Libraría Paz, Librería Escolma, Librería Metáfora, Librería Seijas, Librería Cronopios e Mononoke Manga. Ademais, a editorial pontevedresa Kalandraka contará cun espazo propio para a exposición das súas publicacións.

A carpa permanecerá aberta ao público en horario de 11.00 a 14.00 h e de 18.00 a 22.30 h (agás o domingo, que pechará ás 22.00 h).

Ademais dos postos de venda das librarías, o evento reunirá a máis dun cento de escritores, escritoras e profesionais do ámbito editorial e cultural que protagonizarán un amplo programa de actividades destinadas a fomentar a lectura e o amor polos libros. 

O concelleiro de Cultura, Demetrio Gómez Xunqueira, acompañado por representantes das librarías colaboradoras, presentou o programa, que abrangue propostas para todas as idades e que abrirá cada unha das tres xornadas con actividades dirixidas ao público infantil.

Begoña Caamaño, memoria viva

A programación do venres 3 de xullo arrancará cunha destacada presenza da literatura para os máis pequenos. Ás 11.30 h, o Colectivo Xurelo ofrecerá o contacontos ilustrado con música Begoña Caamaño. Pequena biografía (Lela Edicións), inspirado na obra homónima e concibido para achegar a figura da escritora homenaxeada nas Letras Galegas 2026. Enrique Mauricio estará acompañado pola ilustradora Tania Solla e polo músico Marcelo Dobode. A continuación, ás 12.30 h, chegará Un verán de contos e música, con Paco Nogueiras, unha proposta da editorial Kalandraka na que a narración oral e a música volverán ser protagonistas.

Xa pola tarde, ás 18.15 h, a programación volverá centrarse en Begoña Caamaño cunha mesa arredor da súa obra e do seu legado, na que participarán Ana Romaní, autora de Volveredes brindar por min (Editorial Galaxia); Paula Carballeira, que presentará O transgredir das ondas (Editorial Galaxia); Beatriz Maceda, con Begoña ou o pracer da amizade (Xerais); e María Xosé Porteiro, que achegará Begoña Caamaño. Xornalismo para a cidadanía. De Vigo a Compostela (Editorial Galaxia). O encontro estará presentado polo escritor e editor Víctor Freixanes.

Traxectoria literaria

Unha hora despois, ás 19.15 h, chegará un dos momentos centrais da xornada, coa conversa entre Manuel Rivas e o xornalista cultural Ramón Rozas, dentro da sección dedicada á traxectoria destacada. A continuación, ás 20.15 h, o público poderá asistir á presentación de La educación del monstruo (Editorial Espasa), a novela coa que a actriz e escritora Elvira Mínguez obtivo o Premio Primavera de Novela. O programa rematará cun encontro arredor da memoria, a historia e a relación entre paisaxe e identidade no espazo atlántico no que participarán o arqueólogo Alfredo González-Ruibal, Premio Nacional de Ensaio 2024 e autor de País en ruinas (Editorial Crítica); Xurxo Ayán e Olga Novo, que presentarán Repil. 20 de abril de 1949 (Edicións Positivas); e Manuel Gago, con Ata que os mares sequen. Unha Escocia en clave galega (Morgante Edicións). María Hermida será a encargada de moderar a conversa.

A mañá do sábado 4 abrirase ás 11.00 h cunha actividade dirixida ao público infantil e familiar, seguida do faladoiro “Arredor de GÁLIX e a LIX galega actual: éxitos e desafíos”. Ás 12.30 h regresará unha das citas xa consolidadas da Festa, Enfiando lecturas, organizada pola Libraría Paz para descubrir voces novas e propostas editoriais diversas. Nesta ocasión daranse cita Xesús Fraga eXerardo Quintiá, coa obra epistolar Tempo de correspondencia (Xerais); María Lado, co poemario Odias a poesía (Ed. Elvira); e Anxos Sumai, coa novela A nena de xeo (Euseino? Editores), nun diálogo moderado pola xornalista Alba Moledo.

Xa na sesión da tarde, ás 18.15 h participarán Tamara Andrés, con Eu son de aquí e de alá (Editorial Galaxia); Carmen V. Valiña, autora de Illa de sangue e As tolas que non o eran (Editorial Galaxia), obra esta última distinguida co Premio Losada Diéguez de Investigación 2026 e traducida ao castelán por Pepitas; e Alba Tomé, que falará de As humidades (Editorial Galaxia), nun encontro presentado por María Xesús López Escudeiro.

Ás 19.15 h será a quenda de María Solar, Irene Lourido e Victoria Pinal, que conversarán sobre as súas obras máis recentes: As malas ideas, O lado nobre e Tiña eu razón (Xerais), respectivamente, tres obras que afondan na identidade, nas relacións persoais e nas experiencias vitais. A conversa contará coa condución da xornalista Chus Gómez Dorrego.

Voces e conversas

A partir das 20.15 h terá lugar un encontro que reunirá a Manel Loureiro que presentará Antes de que todo cambie (Planeta), e Manuel Jabois que compartirá co público as claves de La víspera (Alfaguara). O diálogo estará conducido pola xornalista Belén López.

Como peche da xornada do sábado, desenvolverase unha mesa dedicada á música e á cultura popular galega coa participación de Lois Pérez, autor de Hoxe toca Leiva? (Xerais), e Fernando Fernández Rego, que presentará Andrés do Barro. A xénese do pop en galego (Editorial Galaxia), presentada pola xornalista Teresa Cuíñas.

O domingo 5 comezará cunha nova actividade para público familiar da man de Nacho Rubio e a súa obra Os nenos porcalláns (Pepa a Loba Editora), nunha sesión de contos e ilustración. Ás 12.30 h celebrarase o tradicional Vermú Literario de Pinto e Maragota arredor da obra gañadora da quinta edición do premio pola diversidade sexual e de xénero, As esquinas (Xerais), de Miguel Calvo Marques. O encontro contará coa participación de Sara Vila, escritora e membro do xurado, e da concelleira de Igualdade, Anabel Gulías, e estará amenizado por Hugo Andrade DJ.

Xa pola tarde, ás 18.15 h, Arturo Lezcano falará de O país invisible (Libros del K.O.), Juan de Sola de Entre los muros del olvido (Libros del Futuro) e Valentín Carrera de El mundo desde abajo. La odisea australiana de Rosendo Salvado (Editorial Folch & Floch), obra gañadora do I Premio Altaïr de Literatura de Viaxes. Os tres autores dialogarán sobre a crónica, a memoria e a viaxe nun encontro moderado pola xornalista Laura Fresneda.

Ás 19.15 h tomarán a palabra José Ignacio Carnero, que presentará Os fabuladores (Aira Editorial, con edición en castelán en Random House), e Francisco Narla, un dos autores galegos de maior proxección no ámbito da novela histórica, que presentará Ultreia e Suseia (Editorial Istoría. Grupo Planeta).

Clausura

A clausura da novena edición da Festa dos Libros contará coa participación de dúas das autoras de maior éxito do panorama actual: Arantza Portabales, referente da novela negra galega contemporánea, que presentará Asasinato no muíño do cura (Editorial Galaxia), e María Oruña, unha das voces máis destacadas da narrativa de misterio e suspense, que conversará arredor de La Cámara de las Maravillas (Plaza & Janés), nun encontro moderado polo xornalista Álex Espiño.

Ademais das presentacións e faladoiros, a Festa dos Libros incluirá durante toda a fin de semana sinaturas de exemplares, encontros cos lectores e lectoras e diversas actividades complementarias arredor do libro e da lectura como un roteiro literario, o Cafeciño & Draw ou a observación solar, entre outras.