Pontevedra, 21 de outubro de 2024. O Concello de Pontevedra achegará unha programación especial de cara á ‘Noite dos Calacús’, que botará a andar o sábado 26 e rematará o 3 de novembro. O edil de Cultura e Festas, Demetrio Gómez anunciaba que : “Temos por diante non unha noite de medo, senón unha semana de medo. A partir desta finde semana comezamos a programación do Samaín, e acompáñanme todas estas persoas porque vai estar media Pontevedra implicada e traballando para que isto saia ben e fáltanos que a outra media Pontevedra participe nas actividades. Recuperamos a tradición dos nosos avós e o día 31 imos ter a Procesión das Ánimas. Queremos convidar a todos os pontevedresese e pontevedresas a acompañarnos polas rúas de Pontevedra acompañado da Aula Municipal de Teatro e música de Adarve. O sábado 26 temos xa o primeiro obradoiro no Mercado para facer disfraces para a procesión das Ánimas e o domingo 27 visitas guiadas ao cemiterio de San Mauro pola mañá para público familiar e pola tarde, adulto. Tamén varias panadarías de Pontevedra van recuperar o Pan de ánimas con diferentes versións. 

O día 31 terá lugar a festa no Mercado, con postos de comida e bebida, tren de castañas e obradoiros de tallado de calacús, cociña de defuntos, contos de medo e arrepíos. Aprenderase a facer os colares de zonchos e tamén disfraces de ánimas para poder acompañar a procesión que percorrerá o centro histórico para regresar ao Mercado e continuar a festa con Señora Dj. 

“Temos un programa completísimo para pasar a semana do Samaín. Nós somos o motor que coordina pero estas cosuas son posibles porque estamos nunha cidade viva, con moita xente disposta a participar e este ano demos un paso adiante con respecto a anos anteriores con esta programación.”, afirmou o concelleiro Demetrio Gómez.

Consulta a programación completa en: https://www.pontevedra.gal/arquivos/2024/Programa-Noite-dos-CALACUS-2024_WEB.pdf