Soutomaior, 12 de xuño de 2024. O BNG de Soutomaior puxo remateá súa campaña de recollida de sinaturas para esixir a fin dos recortes do PP na sanidade pública do noso concello. En total foron medio milleiro os veciños e veciñas que se sumaron a esta iniciativa, coa que o BNG esixirá á Xunta que cumpra co prometido na reunión do pasado mes de xullo entre o xerente da área sanitaria de Pontevedra, José Flores, e o alcalde de Soutomaior, Manu Lourenzo. Nesta reunión, a Xunta comprometeuse a poñer un médico máis no centro de saúde de Arcade co comezo de 2024, algo que en xuño deste ano aínda non se cumpriu. 

Ademais, a recollida de sinaturas tamén responde á dramática situación no servizo de Pediatría do centro de saúde. Soutomaior leva sen contar cun ou cunha pediatra máis de ano e medio, despois de que a Xunta decidise non cubrir a baixa de longa duración da anterior facultativa. Isto obriga aos pais e nais a levar aos seus pequenos enfermos a Pontevedra para ser atendidos ou a contratar seguros privados, xerando un evidente sesgo con quen non ten os recursos económicos para acceder a estas alternativas. 

O responsable local do BNG, José Costas, anunciou que o BNG levará ao Parlamento galego estas sinaturas nas vindeiras semanas. “O BNG, xunto coa veciñanza de Soutomaior, levamos anos a esixir a fin dos recortes da Xunta na nosa saúde. Fronte a iso, puidemos ver o silencio cómplice do PP de Soutomaior e de quen durante moitos anos xurou defender o noso concello cando era alcalde, pero que cando de verdade fixo e fai falla levantar a voz en contra da situación que está a vivir a nosa xente, alíñase co seu partido en contra dos intereses da veciñanza de Soutomaior”, concluíu Jose Costas.