Pontevedra, 24 de xaneiro de 2025. Este sábado, 25 de xaneiro, Pontevedra escribirá un novo capítulo na súa historia cultural ao ser sede da gala dos Premios Feroz. A cerimonia, que terá lugar no Recinto Feiral, congregará a máis de mil persoas, figurando algunhas das persoas máis recoñecidas do cinema e do sector audiovisual do Estado, como Almodóvar, Najwa Nimri, Candela Peña, Carmen Machi, Anna Castillo, Eduard Fernández, María Léon ou Patricia López Arnaiz, entre outros. 

O alcalde, Miguel Anxo Fernández Lores, compareceu en rolda de prensa, acompañado da presidenta da Asociación de Informadores Cinematográficos de España (AICE), María Guerra, e da persoa encargada de dirixir e conducir a gala, La Dani. 

“Estamos moi satisfeitos e emocionados con todo o que foi pasando ao longo destes meses, desde o intre no que nos postulamos a acoller estes premios até hoxe, ás portas de celebralos; polo camiño estivemos no Festival de cinema de San Sebastián, a nosa veciñanza puido gozar dunha programación incríbel, que logrou un éxito de participación tremendo…", indicou o rexedor. “Sempre dixemos que queriamos deixar pegada nos Feroz e eles en nós. A cultura é un elemento imprescindíbel nesta cidade, mantendo o audiovisual en todas as súas formas unha relación realmente especial coa vila”. 

O rexedor lembrou que o obxectivo do Concello a través dos Feroz foi sempre implicar á cidade con este evento e coa cultura audiovisual, polo que até o último día “contamos cunha programación especial que terá a súa continuidade este ano, de cara a gala do 2026”. “Fixemos un esforzo especial neste sentido, por iso abrimos o Auditorio do Pazo da Cultura para que a veciñanza poida seguir a retransmisión o máis perto posíbel”. 

Lores agradeceu o traballo que fixo posíbel a programación dos últimos meses, así como a gala deste sábado; tanto a María Guerra como ao seu equipo dos AICE, pasando polos traballadores e traballadoras do Concello, patrocinadores e, “en xeral, a todo o mundo que quixo e quere formar parte desta aventura colectiva”. 

María Guerra agradeceu a implicación da cidade de Pontevedra ao longo de toda a programación previa á gala, sinalando que nunca viran unha asistencia tan masiva a este tipo de actividades en ningunha das citas ou sedes anteriores. 

Pola súa banda, La Dani comentou e describiu a súa estancia en Pontevedra como unha experiencia realmente fermosa e sorpresiva, agardando poder presentar unha gala “diversa, sorprendente e divertida”.