Pontevedra, 3 de abril de 2025. O alcalde, Miguel Anxo Fernández Lores, informou da concesión por parte do Comité Olímpico Español da placa olímpica do COE a Pontevedra en recoñecemento á súa valiosa contribución na promoción do deporte. 

O recoñecemento chega trala proposta realizada polas federacións de natación e triatlón, e que foi apoiada “por todo o mundo”. “Vemos recoñecida de novo esa actividade deportiva que se realiza na cidade, a través de campionatos nacionais, estatais, europeos e mundiais”, explicou. 

“Pontevedra é a cidade do deporte a todos os niveis”, continuou o rexedor. “Sobran os exemplos para demostralo, e abonda pensar na pasada fin de semana ou en calquera das moitas nas que temos eventos de primeirísima orde, achegando deportistas locais e de todo o mundo até Pontevedra, logrando un impacto económico e social que todos vemos e percibimos”. 

O vindeiro 8 de maio, Fernández Lores viaxará até Madrid para participar na cerimonia de entrega deste galardón. Agarda facelo acompañado do xefe de servizo de Deportes do Concello de Pontevedra, en representación desta área municipal, á que lle agradeceu o seu traballo diario, sen o cal sería imposíbel optar a este tipo de recoñecementos.