Caldas, 3 de abril de 2025. O Concello de Caldas de Reis está a celebrar o ‘Mes do Libro’ cunha programación especial na Biblioteca Municipal que inclúe premios á veciñanza máis lectora, teatro, obradoiros e contacontos. O primeiro evento da axenda foi a conmemoración do Día do Libro Infantil e Xuvenil onte 2 de abril, cando a Concellería de Cultura, da man do Tenente de Alcalde Manuel Fariña, fixo entrega de agasallos a cinco rapaces e rapazas por ser os que máis préstamos levaron para a casa durante 2024. 

O nacionalista destacou que a rapazada premiada ten “unha fermosa e sorprendentemente ampla relación cos libros”, polo que convidou a seguir nesa liña e a seguir sendo grandes usuarias da biblioteca municipal, onde poden atopar centos de libros diferentes. Segundo os datos que deu Fariña, o rapaz con máis préstamos, Diego, levou para a súa casa un total de 137 libros durante o pasado ano, o que supón unha media de máis de 11 libros cada mes. A crianza situada en quinto posto retirou 53.

As e os premiados recibiron uns pequenos obsequios e tamén un diploma . “A lectura ten moitos beneficios dende idades temperás, así que con este pequeno recoñecemento só agardamos que sigades a cultivar o voso hábito, que estamos seguros será para toda a vida”, dixo Fariña. 

A seguinte entrega de premios –para maiores de 14 anos- será o vindeiro 23 de abril, que coincidirá coa celebración oficial do Día do Libro. Entón daranse agasallos a cinco persoas adultas e un adolescente pola súa afección á lectura. 

Ademais destes recoñecementos públicos, o Concello incluirá tamén neste ‘Mes do Libro’ varias actividades dentro do programa ‘Rebumbio na biblioteca’. Este venres ás seis da tarde haberá un espectáculo cómico teatral –recomendado para crianzas a partir de 4 anos- titulado ‘Superheroe’, a cargo de Fran Rei.

Xa  o venres 11 de abril (18h) organizarase un obradoiro científico tamén para nenas e nenos de máis de 4 anos a cargo de ‘Héroes para la ciencia’. Neste taller realizaranse experimentos e actividades sinxelas de divulgación, fomentando a ciencia creativa e manipulativa. 

Finalmente, o 25 de abril (18h) terá lugar un contacontos teatral a cargo de ‘Trinketrinke Teatro’ e a peza ‘Os ratiños da caixa’. É para nenos e nenas de máis de tres anos.

Para todas as actividades é precisa inscrición previa na propia Biblioteca ou no teléfono 986 53 06 04.