Pontevedra, 18 de decembro de 2025. O alcalde, Miguel Anxo Fernández Lores, fixo un repaso exhaustivo das obras e investimentos tramitados, adxudicados ou en licitación ao longo do ano 2025, destacando a xestión realizada por parte do Concello de Pontevedra. 

Poñendo o foco na cuestión económica, é posíbel falar dunha suma superior aos 66,5 millóns de euros a través dos distintos proxectos en marcha. Estas cifras non teñen precedentes na xestión municipal, sendo un montante absolutamente descoñecido e histórico ata o de agora. O rexedor quixo resaltar que a importancia non reside só na cifra económica, senón na gran transcendencia das actuacións para a cidade, que melloran o seu funcionamento e servizos e redundan na mellora da calidade de vida dos veciños e veciñas. 

As obras que están actualmente en licitación ou pendentes de inicio inmediato suman un montante de case 26 millóns de euros. Neste apartado inclúense a rehabilitación de firmes (máis de 5 millóns de euros), as obras no Gafos, Rosalía de Castro, Casimiro Gómez, a iluminación da zona norte (xa en execución), entre outras. 

Por outra banda, as obras en execución ou rematadas este ano suman 14,6 millóns de euros. Entre elas atópanse o Parque da Parda, a iluminación da Illa do Covo e a Xunqueira de Alba, o Centro Social de Acevedo, e a reforma e remate do Teatro Principal. Neste grupo tamén figuran proxectos importantes rematados, como o do edificio de Churruchaos (cuxa recepción está asinada) e a rúa da Santiña, xunto co Conservatorio e a xestión intelixente da mobilidade (cámaras e sensores). 

En relación con outros traballos e proxectos executados no ano 2025, investíronse 2,9 millóns de euros, abarcando dende as actividades de Capital Gastro, a mellora do acceso ao campo de fútbol de Salcedo, o mantemento rural (Rúas San Cristóbal), e o mobiliario urbano. 

O repaso incluíu, ademais, outras xestións importantes realizadas en 2025, cun total de 21,8 millóns de euros. Lores destacou a compra de terreos en San Amaro, a subvención do EDUSI (8,7 millóns de euros, dos cales un 60 % é subvención europea), e o contrato de residuos, cunha achega anual de 11,9 millóns de euros. 

Cómpre sinalar que alcalde tamén informou sobre o proxecto de mellora e reforma da pasarela 12 da rúa 12 de novembro, incluída no repaso das obras, indicando que se recibiu a autorización de ADIF. A execución desta obra, que ten un prazo de 9 meses e xa conta cun contrato asinado coa empresa responsábel, retomarase unha vez pasados os días de Nadal.