Pontevedra, 12 de febreiro de 2026. O alcalde de Pontevedra, Miguel Anxo Fernández Lores, xunto a representantes da Xunta de Galiza, a Federación Galega de Natación e o Club Natación Galaico, presentou o Campionato de España de Seleccións Autonómicas en categorías infantil e júnior, que terá lugar nas instalacións de Rías do Sur durante os días 13, 14 e 15 de febreiro. 

O rexedor destacou a magnitude da cita, que atraerá á cidade a preto de 540 nadadores e nadadoras (aproximadamente 20 mulleres e 20 homes por selección) procedentes das 17 comunidades autónomas e da cidade autónoma de Melilla. Lores subliñou o impacto positivo que este evento terá para a economía local, o sector servizos e a hotelería, tanto de Pontevedra como dos concellos limítrofes, poñendo en valor as bondades das Rías Baixas para as familias e acompañantes que visiten a zona. 

Desde a Federación Galega de Natación destacouse a importancia estratéxica de Pontevedra para a Real Federación Española de Natación, lembrando que este campionato específico non se celebraba na cidade desde o ano 2007. A competición servirá como test clave para citas internacionais como o Campionato de Europa Júnior e a Copa Comen. 

No plano deportivo, Galiza participa cunha selección de 32 nadadores e nadaroras, mentres que Euskadi, Andalucía e Cataluña son as delegacións máis numerosas. Como novidade técnica e loxística, por primeira vez serán instaladas gradas supletorias a pé de piscina para acomodar a todos os deportistas, técnicos e voluntarios, deixando as gradas superiores exclusivamente para o goce do público. 

Este campionato marca o inicio dun intenso calendario de eventos acuáticos en Pontevedra, que incluirá proximamente a Copa Federación de Waterpolo e, a finais de maio, a Copa do Mundo de Natación Artística.