Pontevedra aspira a volver ser en 2026 a sede da gran final das series mundiais de triatlón
Pontevedra, 15 de outubro de 2024. Pontevedra quere volver ser a capital mundial do triatlón. Se ben a intención inicial era que no ano 2027 volvese a candidatarse para ser sede da Gran Final das Series Mundiais, Pontevedra adiantará a súa candidatura para o 2026, por consello das distintas federacións de triatletas.
O alcalde, Miguel Anxo Fernández Lores, sinala que “Pontevedra está e estará preparada sempre para acoller unha cita desta clase”. “Xa presentamos a nosa candidatura para a Gran Final das Series Mundiais 2026”, indicou. “Tal e como nos transmitiron temos máis posibilidades de facelo neste ano e así aspiramos a facelo. A decisión da concesión será tomada de xeito inminente e agardamos que sexan boas novas para Pontevedra”.
Segundo o previsto, a Gran Final desenvolveríase a finais de setembro e principios de outubro do 2026. O alcalde lembrou que o ano que vén, no 2025, Pontevedra xa vivirá outro fito histórico ao acoller por segunda vez o Multisport.
“As federacións saben que Pontevedra responde, que a cidade se volca de arriba a abaixo con estes eventos deportivos. Somos unha referencia na organización destas probas e na capacidade para ofrecer toda unha programación paralela de ocio e cultura”, explicou o rexedor. “Cando nos propoñen cambiar eles saben que nós temos a posibilidade de logralo. Queremos que así sexa”.
As Series Mundiais do 2026 incluirán algunha novidade respecto ao 2023, como a chegada de preto de 1.500 triatletas a maiores, debido á incorporación de novas probas como o triatlón supersprint e triatlón de relevos mixtos.