O alcalde, Miguel Anxo Fernández Lores, acompañado da concelleira responsábel do Rural, María Xosé Abilleira, mantivo unha xuntanza con distintos veciños e veciñas da parroquia de Cerponzóns, após a finalización dos primeiros traballos de acondicionamento e mellora da seguridade viaria da estrada municipal que dá acceso ao núcleo de A Ermida dende a N-550. 

As actuacións contemplaron a pavimentación e adecuación superficial dos firmes, considerando o saneo das zonas máis deterioradas, e ampliouse a plataforma na parte sur do trazado cara o leste, conlevando a execución de novos muros de contención aliñados exteriormente a catro metros do eixo da estrada. 

Doutra banda, completouse a actuación coa execución de dous lombos redutores de velocidade, a mellora da rede de drenaxe existente (coa limpeza de cunetas na parte norte e canalización na parte sur), a instalación de colectores de fecais para conectar á rede de saneamento contigua (dando así cumprimento ao acordo plenario no que se apostou por seguir ampliando progresivamente o saneamento ás vivendas illadas do rural) e o pintado de marcas viarias. 

Queda pendente de execución, o revestimento con formigon das cunetas e a instalación da sinalización vertical. Cómpre lembrar que o orzamento base de licitación do proxecto foi de 128.955,24 € (IVE incluído), contando cun prazo de execución das obras de catro meses. 

Este proxecto trátase dunha actuación demandada pola veciñanza da zona, e supón unha importante mellora da seguridade viaria e da accesibilidade xeral para todo o lugar. Ademais, é un exemplo da boa coordinación e colaboración entre o Concello, a Asociación de Veciños da parroquia e os propios residentes da zona, o que permitiu sacar adiante unha actuación necesaria para mellorar o día a día da veciñanza.