A construción do novo pavillón de Monte Porreiro permitirá a creación dunha praza pública de 5.000 metros cadrados

Miguel Anxo Fdernándes Lores presentando o novo pavillón de Monte Porreiro
Miguel Anxo Fdernándes Lores presentando o novo pavillón de Monte Porreiro
A construción do novo pavillón de Monte Porreiro permitirá a creación dunha praza pública de 5.000 metros cadrados

Pontevedra, 1 de abril de 2025. O alcalde de Pontevedra, Miguel Anxo Fernández Lores, presentou o proxecto definitivo para a construción do novo pavillón de Monte Porreiro, especializado na modalidade deportiva do tenis de mesa. Este equipamento municipal traerá consigo a creación dun novo espazo público, aberto a toda a veciñanza do barrio, próximo aos 5.000 metros cadrados. 

Trátase dun proxecto pioneiro, que contempla a construción dun equipamento semi-soterrado, que achegaría a transformación de toda unha parcela que permitirá a conexión peonil entre rúas, ademais de xerar nosos espazos verdes, con sombra e cunha pista polideportiva ao aire libre. Non é baladí, trataríase da maior praza pública construída nunca neste barrio, comparable, en metros cadrados, ao tamaño da Praza da Ferraría, os Xardíns de Casto Sampedro e á Praza da Estrela xuntos. 

Cómpre sinalar que nesta praza exterior situarase a entrada do futuro pavillón, ao tempo que contará cunha gran pérgola duns 800 metros cadrados que dará sombra nos meses de máis calor e ofrecerá acubillo contra a choiva nos meses máis húmidos, ofrecendo protección todo o ano. 

O rexedor explicou que a obra será licitada nas vindeiras semanas de abril por 6.416.771 euros e que contará cun prazo de execución de dous anos. O edificio deportivo está pensado tanto para adestramentos como para competicións oficiais, prometendo ser unha referencia dentro do Estado á hora de falar de tenis de mesa. 

Por suposto, a obra contempla a demolición do actual pavillón existente e a construción dese equipamento de vangarda, máis grande e actual, que contará cunha superficie de 3.624 metros cadrados, dividido en dúas alturas, situándose na planta baixa a pista deportiva (1.250 metros cadrados), os vestiarios, o ximnasio e o almacén. No nivel superior estaría a área administrativa, as gradas —con capacidade para 320 persoas sentadas e 200 de pé— e o acceso para o público xeral. 

A empresa responsábel da redacción do proxecto foi a pontevedresa Uña+Amandi, estudio de arquitectura que xa traballou na reforma e rehabilitación da Casa Consistorial —a empresa Refuerza colaborou tamén neste labor—. O soterramento deste equipamento permitirá un consumo de enerxía mínimo á hora de manter a súa temperatura interior, ao tempo que aposta polas enerxías renovábeis. Contará con accesibilidade universal. 

A construción do novo pavillón de Monte Porreiro permitirá a creación dunha praza pública de 5.000 metros cadrados