Caldas, 1 de abril de 2025. A piscina municipal de Caldas xa ten en activo as placas solares coas que se autoabastece de enerxía e, segundo afirma o tenente de alcalde Manuel Fariña, durante os un mes que pasou dende a súa instalación xa se nota un aforro no consumo enerxético. A intención do goberno local é que os importes que agora se pagan dende o Concello polo consumo de electricidade do equipamento deportivo baixen un mínimo dun 30%, unha cifra que se pode superar amplamente , incluso multiplicar, de facer un uso optimizado do sistema.  

Os paneis fotovoltaicos instaláronse no mes de febreiro no tellado do edificio do pavillón, nunha superficie de 800 metros cadrados nos que a luz solar incide sen ningún tipo de barreira. En total, colocáronse 40 placas de 550wp cada unha para producir máis de 23.200 kilowatios. “A nosa intención é utilizar o xestor intelixente, que mide todos os datos relativos á produción e ao consumo e vai crear recomendacións de uso personalizadas, coordinando o funcionamento cos equipos eléctricos da piscina e do pavillón. Agora estamos a dar os primeiros pasos, pero a intención é sacar todo o proveito posible e facer máis sustentable a piscina”, subliña Fariña.

A piscina disporá tamén dunha pantalla que informará sobre a xeración eléctrica en tempo real visible para as persoas que visiten o edificio, así como dun sitio web de consulta pública que deberá facilitar a información de produción eléctrica en tempo real e datos históricos da instalación. 

A instalación dos paneis foi unha realidade grazas ao proxecto presentado no IDAE polo anterior goberno da Deputación en 2022 para conseguir fondos do Plan de Recuperación, Transformación e Resiliencia, dentro do Programa de axudas a proxectos singulares locais de enerxía limpa en municipios do reto demográfico (Programa DUS 5000). Esta iniciativa pretendía a mellora enerxética en edificios, o fomento de inversións verdes e, en particular, o autoconsumo. 

O tenente de alcalde Fariña destaca que o Concello está a traballar tamén na instalación doutros campos de paneis solares noutros edificios de titularidade municipal. Lembra que incluso se redactara un proxecto para colocar as placas no edificio do Concello, mais non fora posible polos impedimentos esgrimidos pola Xunta de Galicia dende o seu departamento de Patrimonio, ao tratarse dun inmoble emblemático e con protección.