Caldas, 14 de novembro de 2024. Caldas de Reis saca músculo como cita de referencia no trail galego coa organización da segunda edición do ‘Trail Laxe dos Bolos’ o vindeiro 16 de marzo de 2025. A vila termal incluirá un campionato absoluto –incluído dentro do calendario oficial do ‘Galicia Trail Running Series’ e que servirá para definir a Selección Galega-, e contará tamén con dúas distancias máis e unha andaina popular aberta a calquera participante. 

Segundo explica o tenente de alcalde e responsable da concellería de Deportes, Manuel Fariña, o Concello está a pechar os últimos aspectos da organización e en breve abriranse as inscricións da man da Federación Galega de Atletismo. A gran cita desputarase nun trazado renovado dentro dunha contorna de especial beleza como é o Monte Xiabre: nesta ocasión predominarán as subidas e baixadas longas, ofrecendo un percorrido claro para as persoas deportistas e bo de seguir para o público. 

O trail ‘Laxe dos Bolos’ forma parte do calendario oficial da ‘Galicia Trail Runnin Series’ no que tamén se inclirán citas na Fonsagrada, Ames, Muros, Barbadás, A Guarda e Chantada no primeiro semestre do ano. En palabras da Federación de Atletismo, a proba caldense contará coas mellores deportistas da especialidade e servirá para definir “en gran medida” como estará formada a Selección Galega, xa que é unha carreira puntuable para o ranking galego. 

Coa celebración desta cita, que cumpre a súa segunda edición, o Concello de Caldas aumenta a aposta polo ‘trailrunning galego’, unha modalidade deportiva con gran tirón. Explica o tenente de alcalde Manuel Fariña que o goberno local pretende sacar rendemento ao binomio deportes-turismo para potenciar a economía local. “O ano pasado inscribíronse máis de 225 persoas, que chegaron a Caldas de Reis acompañadas de moita máis xente. Iso supón un tirón importantísimo para darnos a coñecer e situarnos como unha referencia no mundo do deporte”, subliña o nacionalista.