Caldas, 21 de novembro de 2024. O Concello de Caldas vai repartir 2.000 euros en premios no seu primeiro concurso de curtametraxes ‘Un idioma de cine’. Segundo explica o tenente de alcalde e responsable da Concellería de Cultura, Manuel Fariña, o galardón créase para recompensar a implicación da rapazada caldense nos obradoiros e charlas realizadas o pasado mes de outubro co fin de proxectar o talento no audiovisual e, á vez, promover o uso do galego.

A proposta xurdiu dentro da Programación de Normalización Linguística municipal para a rapazada de 4 da ESO do IES Aquis Celenis, CPR San Fermín e CPI Alfonso VII nunhas clases nas que mozos e mozas aprenderon como gravar as súas propias curtas: como debe ser o proceso creativo, a redacción do guión, a técnica de rodaxe e a gravación, a montaxe, e a postprodución das pezas audiovisuais.

Visto o interese e implicación, e aproveitando que con este tipo de actividades se aumenta a formación da rapazada e se potencia o interese pola lingua, a Concellería de Educación decidiu poñer en marcha o certame-concurso para potenciar a creatividade premiar os traballos máis talentosos.

O concurso será aberto e poderán participar mozas e mozos de ata 30 anos residentes nalgún dos 313 concellos galegos. As curtas presentadas poderán estar gravadas con calquera dispositivo, deben ter unha duración máxima de entre 5 e 10 minutos e de temática relacionada co outono, podendo ser tanto de acción como de animación.

O prazo de inscrición rematará o 10 de decembro de 2024. A participación debe comunicarse a través do rexistro do Concello de Caldas de Reis, preferentemente a través da sede electrónica. 

O primeiro premio será de 700€, o segundo de 500€, o terceiro de 300€ e tamén haberá un galardón outorgado polo público á curta máis votada, que suporá ingresar 500€. Para poder ver as curtas presentadas a concurso as concellerías de Cultura e Normalización Lingüística do Concello de Caldas de Reis organizarán unha exhibición, cuxa data será publicada no taboleiro de anuncios da sede electrónica do Concello de Caldas de Reis e difundida nas redes sociais de @encaldasme. Ao remate da exhibición o público emitirá o seu veredicto depositando o seu voto nunha urna disposta a tal fin.