Pontevedra, 13 de marzo de 2013. A deputada do BNG, Montse Prado defendeu hoxe, na sesión plenaria que se está a celebrar no Parlamento galego, unha Proposición non de lei  sobre  as  actuacións do Goberno galego no asentamento industrial de ENCE en Lourizán.

Na súa intervención, a deputada nacionalista acusou ao Partido popular de non aclarar a súa posición sobre o asentamento e permanencia de ENCE, “vostedes, din unha cousa e fan a contrario”, dixo, e emprazou ao PP a votar favorabelmente a iniciativa nacionalista para  “anular definitivamente o proxecto sectorial do asentamento industrial de ENCE”.

O alcalde e a cidadanía de Pontevedra contra a consolidación da pasteira

Neste sentido, avanzou que o Alcalde de Pontevedra, Miguel Anxo Fernández Lores “fará todo o posíbel para pechar ENCE”  e seguirá loitando para defender os intereses públicos impedindo que se execute o proxecto sectorial e a consolidación da pasteira.

Prado explicou que “a corrupción non é só meter a man na caixa, enriquecerse persoalmente a costa dos recursos públicos e recibir sobres”, a  corrupción “con maiúsculas”, sentenciou,   tamén é  “usar a representación institucional” para facer modificacións e beneficiar a uns poucos, é “usar o DOG e o BOE” para “beneficiar aos amigos e poderosos”.

O PP presente no Consello de Administración de ENCE

A parlamentaria criticou a importante presenza do Partido popular  no Consello de Administración de ENCE  do que forma parte Carlos del Álamo ex-conselleiro de Medio Ambiente na Xunta de Galiza  con Manuel Fraga e Isabel Tocino, Ministra de Medio Ambiente con Aznar.

A gaivota do PP sobrevoa ENCE

Prado ironizou sobre unha campaña publicitaria de ENCE presidida por “unha gaivota” semellante a utilizada no logo do Partido popular e preguntou se esta coincidencia tamén sería “unha casualidade” como a presenza de Carlos del Álamo e Isabel Tocino no consello de Administración de ENCE ou que se usen “as portas xiratorias”  da representación pública para “lexislar en favor dos poderosos”.

A parlamentaria afirmou que o Partido popular, tanto no Goberno do Estado como no da Xunta, “ponse ao servizo da pasteira sen condicións” e pediu de novo que o Goberno galego: “ retire o recurso contra a sentenza do TSXG, anule definitivamente o proxecto sectorial de incidencia do asentamento industrial de ENCE, revise a Autorización  Ambiental Integrada (AAI) concedida á pasteira  e manifeste diante do Goberno do Estado “a oposición a que se prorrogue a ubicación de ENCE a través dunha posible modificación lexislativa ou administrativa”.

A pesar dos requerimentos do BNG, o PP votou en contra de anular o proxecto sectorial de ENCE, demostrando máis unha vez a súa connivencia coa pasteira.