Pontevedra, 6 de maio de 2025. A estadía do alcalde de Pontevedra na cidade alemá de Heidelberg servíu para dar a coñecer o Modelo Pontevedra e, ao mesmo tempo, para compartir imprisións e análises co rexedor da cidade alemana.

A estadía comezou o pasado luns 5 na faculdade de tradución e interpretación da universidade máis antiga de Alemania, cunha conferencia de Miguel Anxo Fernández Lores, na que o alcalde explicou os profundos cambios e as transformacións logradas no último cuarto de século, a través do relatorio “Decidir o rumbo cara o futuro - Mobilidade. Unha cidade pensada para as persoas”, que pudo ser seguido en directo en oito linguas (alemán, inglés, francés, español, italiano, xaponés, portugués e ruso). A conferencia quedou gravada nas canles oficiais da universidade para a súa consulta.

O rexedor explicou as distintas decisións que se foron tomando en Pontevedra para mellorar a calidade de vida da mesma, tendo como base a idea de que as súas prazas e rúas deben ser para as persoas. Neste sentido está a decisión de restrinxir o tráfico ao imprescindible no centro da cidade, limitar a velocidade máxima permitida ou utilizar o espazo público para todo tipo de actividades.

Encontro co alcalde de Heidelberg

Ao día seguinte, Lores mantivo un encontro co seu homólogo Raoul Schmidt-Lamontain no que se abordaron actuacións levadas a cabo nas dúas cidades para mellorar a calidade de vida das persoas.

Pontevedra e Heidelberg son cidades coas súas semellanzas e coas súas diferencias, mais desde o punto de vista institucional comparten unha fonda preocupación por tratar de mellorar a vida das persoas que viven e traballan dentro dos seus lindes. Nese sentido, o concepto de xerar espazos máis seguros para os viandantes é unha constante, ao igual que idear proxectos que permitan a recuperación do espazo público para as persoas. 

Lores e Schmidt-Lamontain achegaron cadanseus datos sobre as súas cidades, poñendo sobre a mesa os distintos elementos que fan de cada unha un lugar único. Heidelberg é un núcleo onde a bicicleta —milleiros de persoas veñen desde outras vilas próximas neste transporte— érguese como un elemento totalmente cotiá, coas vantaxes e problemas que iso supón, e está na procura de suprimir algunhas vías principais de vehículos a motor para xerar un circuíto ciclista menos cargado e seguro, ao tempo que busca a reconexión da cidadanía co río Neckar —unha das súas beiras está percorrida por un viario de varios carrís—. 

Lores, pola súa banda, sinalou a importancia das decisións políticas municipais á hora de poñer en marcha proxectos que permitan cidades máis amábeis para as persoas, idea no que coincide o rexedor alemá, que tamén explicou as barreiras administrativas que o Estado pode poñer en certos asuntos, polo que non sempre é doado levar os proxectos a bo porto. 

Ambos os dous rexedores coincidiron tamén no medo ao cambio, que existe, mais non dubidan nos beneficios que trae consigo a redución do tráfico rodado xunto coa eliminación ou limitacións deste en vías comerciais. Ideas e logros como o estacionamento de servizo, a zona de baixas emisións estendida a toda a cidade ou as cero mortes por violencia viaria na contorna urbana desde 2011 reclamaron o interese de Schmidt-Lamontain.