Soutomaior, 4 de abril de 2025. O alcalde, Manu Lourenzo, a concelleira de Hostalería, Rosana Comesaña, o concelleiro de Urbanisno, Pablo Garrido e a concelleira de Igualdade e de Benestar Social, Rosana Martínez Boullosa, fixeron hoxe unha visita á carpa da Festa da Ostra para ultimar todos os detalles da festa por excelencia de Arcade. Hoxe dará comezo  a XXVII Festa da Ostra, será unha edición moi especial, xa que será a segunda que se desenvolva ao abeiro do programa ‘Soutomaior Inclusivo’, unha iniciativa impulsada polo Goberno de Soutomaior co obxectivo de garantir a inclusividade e a igualdade en todas as actividades municipais.

Neste sentido, levaranse a cabo diferentes iniciativas e medidas durante os días que transcorra a festa esta fin de semana, medidas todas elas, que permitirán que todas as persoas, sexa cal sexa a súa condición, poidan desfrutar ao 100% da Festa da Ostra. Unha das principais medidas que se levará a cabo é a instalación dun punto de apoio permanente que prestará axuda ás familias con menores con diversidades funcionais. Neste punto, situado a carón do dispositivo sanitario e de seguridade, facilitaráselles información sobre ‘Soutomaior Inclusivo’. 

Tamén se lles prestarán cascos antirruído para que poidan desfrutar da zona de recreativos e da tirada de foguetes. Ademais, na zona de recreativos haberá horarios ‘sen ruído’: venres 4 de abril de 18:00 a 19:00h.; sábado 5 de abril de 12:00 a 13:00h. e de 18:00 a 19:00h.; domingo 6 de abril de 13:00 a 14:00h. e de 18:00 a 19:00h. e o luns 7 de abril (día do neno e da nena) de 17:00 a 18:00h.  Por outra parte, as nenas e nenos (ou o seu familiar) que teñan a pulseira de SOUTOMAIOR INCLUSIVO ou a tarxeta de discapacidade terán prioridade de acceso ás atraccións sen necesidade de facer cola.

En canto á zona da carpa principal, onde se levarán a cabo os concertos das orquestras o venres e o sábado e a lectura do pregón o domingo, habilitarase unha plataforma para que as persoas con mobilidade reducida poidan desfrutar de maneira cómoda e accesible. Ademais, na lectura do pregón haberá unha persoa interprete de signos. Tamén para as persoas con mobilidade reducida habilitarase un aparcadoiro xunto á rotonda da Ostreira, sinalizado no Plan de Tráfico que o Concello de Soutomaior compartiu nas súas redes estes días.

Nesta XXXVII edición da Festa da Ostra tamén contará co Punto lila. Atención e prevención de violencia de xénero e os horarios serán o 4 abril de 20:00 a 01.00; o 5 abril 12.00 a 15.00 h e 19.00 a 02.00 e o 6 abril 12.00 a 20.00 h. E onde tamén estará presente a Caseta de Información Turística en horario o 5 abril 12:00 a 15.00 h e de 16.00 a 20:00h. e o 6 abril 12.00 a 18.00 h.

Unha Festa da Ostra sostible 

Por primeira vez a XXXVII Festa da Ostra forma parte do Plan de Sostibilidade das Festas de Galicia Suroeste. Debido a este plan a Festa contará con Brigadas de sensibilización medio ambiental nas zonas de maior afluencia. O horario destas brigadas será hoxe venres e mañá sábado de 23.00 a 01.00 h. Estas brigadas estará conformadas por seis persoas que andarán pola zona  informando á xente e concienciando sobre o uso dos colectores e a importancia de recoller o lixo que se xera.

Na festa haberá colectores para separar os residuos con sinaléctica por todo o recinto da festa, na carpa central tamén haberá illas de reciclaxe específicas para papel, plástico e orgánico. A maiores todo o persoal que traballa na festa está concienciado da necesidade e da importancia de separar os residuos nos colectores específicos para os desperdicios que se xeran durante estes días. 

Programación 

Hoxe a XXXVII Festa da Ostra dará o seu pistoletazo de saída coas actuacións das orquestras América de Vigo e da París de Noia a partir das 22:00h. 

O sábado 5 de abril a Festa continuará coa apertura das casetas ás 12:00h., o pasarrúas de Bassica Rapa ás 12:00h. e xa pola noite chegarán as actuacións das orquestras Olympus e Kubo e a partir das 22:00h. e coa tirada de fogos de arteficio ás 00:00h. 

O  domingo 6 de abril o día comezará ben cediño ás 10:00 da mañá co pasarrúas da BANDA ARTÍSTICA DE ARCADE e BANDA CULTURAL DE ARCADE dende o Calvario ata o Peirao. 

Ás 11:00 h. terá lugar a apertura de casetas de degustación, unha hora máis tarde, ás 12:00 h. actuarán o grupo de jazz Fernando Sánchez Jazz Cuartet e ás 13:00h. terá lugar a lectura do pregón a cargo do contador de historias e monologuista Celso Fernández Sanmartín “Celsiño” nacido en Lalín pero veciño de Soutomaior xa que nestes momentos vive no noso concello. 

Xa pola tarde terá lugar a actuación dos “Festicultores Troupe” a partir das 18:00h. no Peirao de Arcade.