Pontevedra, 4 de abril de 2025. O concelleiro de Mobilidade, César Mosquera, deu conta da viaxe institucional que o Concello de Pontevedra realizará para participar no IV Congreso Internacional de Paisaxe Urbana “Memorial Ferran Ferrer Viana” que se celebra en Costa Rica, na cidade de San José. 

César Mosquera repasou a escaleta da viaxe e das distintas actividades que se contemplan durante a estancia no país de América Central, tanto pola súa banda coma pola tenente de alcalde, Eva Vilaverde. “Por cuestións de conexións e diferencias horarias, chegaremos o sábado. Teremos unha axenda bastante intensa, tendo o luns unha recepción na embaixada española de Costa Rica, para logo ter unha benvida polas autoridades locais e polos organizadores do congreso”, explicou. 

O martes, pola mañá cedo, comezará o congreso como tal, que se celebrará ao longo de toda a xornada. O mércores, ás 07.15, os representantes do Concello de Pontevedra entrarán en directo no principal programa de radio do país, para xusto despois participar como poñentes na sesión central do congreso. O xoves continuará a programación do congreso, incluíndo a entrega do premio ao Concello de Pontevedra, o Eusebio Leal Spengler La ciudad es la gente, que Mosquera sinalou como “moi acaído para a nosa vila e a súa veciñanza”. O venres comezará a volta. 

Mosquera explicou que será el o encargado de realizar o relatorio da sesión central, na que tamén participarán representantes doutras cidades do mundo como Sao Paulo ou Río de Janeiro. “Queremos que sexa unha introdución ao que é o noso modelo, pero en base aos nosos resultados. O tempo irá xusto e queremos centralo nesa idea de resultados, ademais de subliñar a importancia do local, da xestión municipal, evitar e combater o desapego ao lugar no que vives”. 

Pola súa banda, Eva Vilaverde recollerá orecoñecemento ao Concello de Pontevedra. Trátase do primeiro galardón deste tipo que chega desde América Latina, sumándose a listaxe dos distintos premios internacionais que Pontevedra e o seu modelo urbano foi recollendo durante os últimos anos, con convites chegados desde Asia, Europa ou os Estados Unidos.