Caldas, 4 de abril de 2025. Caldas de Reis está en modo conta atrás para a súa Festa da Primavera, que terá unha das actuacións máis agardadas do ano: a Orquestra Panorama estreará o seu novo espectáculo e o seu novo macroescenario para a xira de 2025 na actuación do sábado 12 da vila termal. O Tenente de Alcalde Manuel Fariña explica que o Concello está xa a ultimar todos os preparativos da nova edición da festa, dende o Plan de Seguridade ata os xeradores de enerxía, para que “resulte todo un éxito”.

Fariña explica que Panorama está a ensaiar nas súas naves de Caldas a súa nova tempada de concertos que virá cargada de novidades en materia musical con novos temas e un espectáculo de máis de tres horas ademais de moitas melloras tamén na escenografía e no seu espectacular show audiovisual. 

Unha das principais novidades será o escenario, cun fronte de máis de 60 metros de largo, que suporá o máis grande dos utilizados na historia da agrupación. Advirte o Concelleiro que será utilizado por primeira vez en Caldas de Reis o día 12 de abril. 

Fariña destaca que as dimensións do concerto requirirán de medios extraordinarios. Un dos exemplos é que o Concello terá que poñer a disposición da Panorama dous grupos electróxenos de 220 kva utilizados en exclusiva para a orquestra, cando o habitual é instalar apenas un de 130 e é suficiente para os grupos de música máis habituais.

Aínda é unha sorpresa total o nome do espectáculo, que cabe a posibilidade sexa anunciado na vindeira semana, xusto antes dos primeiros concertos deste mes de abril. Xa se sabe que actuación incorporará novos artistas, novo repertorio e tamén algunhas baixas. Cabe lembrar que hai meses, o trombonista Kotwey Marval anunciou a súa marcha, á que se sumou pouco despois a dunha das voces máis queridas do grupo, a galega Fátima Pego, tras seis anos na formación.

Fariña destaca que Caldas sempre apostou pola Panorama polo tirón e a capacidade de atraer público á vila. Subliña que é unha formación que leva trinta anos sobre os escenarios de localidades do país e do resto do estado, converténdose nun dos maiores atractivos das celebracións locais ao ser considerada a “mellor orquestra de España” cos seus máis de 20 profesionais enriba do escenario. 

A Festa da Primavera completarase o sábado 12 de abril coa actuación de ‘A Gramola’, que promete continuar coa música durante varias horas cun repertorio deseñado especialmente para ‘enganchar’ a todo o público que se achegue ao recinto habilitado no estacionamento da Tafona. 

Explica o Tenente de Alcalde Manuel Fariña que, igual que o ano pasado, os concertos desenvolveranse dentro dun espazo pechado e acondicionado para garantir a máxima seguridade das persoas asistentes. Como xa se anunciara, ante a previsión dunha grande afluencia de público, estará operativo un Plan de Autoprotección que prevé controlar a afluencia de xente e ter preparadas de antemán cuestións como posibles evacuacións ante situacións de risco. 

A novidade deste ano é o cambio no acceso, que se realizará unicamente a través do paseo fluvial, nas inmediacións da Praza do Camiño. O recinto da Tafona, ademais do concerto da Panorama o sábado 12, acollerá o venres 11 o ‘Kalidas Primavera Fest’ con sesións de DJ . O día 13 tamén están previstas as actuacións de Pepo Suevos e os Alkar.