Soutomaior cumpre máis de 500 días sen pediatra no centro de saúde de Arcade
![Centro de saúde de Arcade](/asset/thumbnail,992,558,center,center/media/bngpontevedra/images/2023/10/31/2023103112451554470.jpg)
Soutomaior, 22 de marzo de 2024. Soutomaior cumpre máis de 500 días sen pediatra no centro de saúde de Arcade. A situación remóntase a novembro de 2022 cando a facultativa que ocupaba o posto de pediatría nese momento tivo que pedir unha baixa e a Xunta decidiu non cubrila, deixando a case 1.000 nenos e nenas sen atención pediátrica. Neste ano e medio, a Xunta obviou as numerosas queixas da veciñanza do noso concello e as peticións do BNG para buscar unha solución a esta situación. No canto, o Goberno galego optou por poñer parches a este problema, pero que en ningún caso supoñen unha solución real.
A falta de pediatras durante todo este ano fixo que os períodos de agarda fosen de varias semanas, o que obrigou a moitos pais e nais a levar aos seus fillos a Pontevedra para que puidesen ser atendidos. Ademais dos evidentes problemas de conciliación que isto supón para moitas familias de Soutomaior, a escaseza xeneralizada de facultativos e facultativas no conxunto da comarca provocan o colapso dos centros de urxencias, ao ter que atender casos que deberían pasar previamente pola Atención Primaria.
A concelleira de Sanidade, Rosana Martínez, sinalou que “é fundamental para o noso concello contar cun servizo de pediatría que garanta a atención a todos os nenas de Soutomaior. As e os pediatras non só atenden as crianzas cando xa están enfermas, senón que o seu traballo tamén incide na prevención de doenzas antes de que estas se produzan. Por iso é fundamental que o noso concello conte cun servizo de pediatría co persoal e recursos necesarios, que eviten que as familias teñan que desprazarse a urxencias a Pontevedra ou agardar varias semanas para ter unha cita”.
Pola súa parte, o responsable local do BNG, José Costas, sinalou que “a Xunta non pode seguir poñendo parches a esta situación mentres quen máis o necesita, os nenos e nenas de Soutomaior seguen sen ser atendidos por un pediatra. Nas vindeiras semanas o BNG desenvolverá varias iniciativas nas rúas, no Concello e no Parlamento para esixir solucións á Xunta, que leva demasiado tempo obviando á veciñanza de Soutomaior”, concluíu José Costas.