Soutomaior, 6 de novembro de 2024. Este martes pola noite 6 integrantes da agrupación de Protección Civil Oitavén-Tea, que presta servizo en Soutomaior, partiron cara a Valencia co obxectivo de participar no dispositivo de axuda nas zonas afectadas pola DANA da pasada semana. En concreto, Oitavén-Tea levará a cabo tarefas de limpeza e arrastre de cascallos no termo municipal de Massanassa. As e os integrantes da agrupación desprazaronse xunto con outros nove efectivos das agrupacións de Protección de Valga e de Cangas. Os voluntarios traballaron en quendas de 72 horas, despois das cales regresaran, tal e como establece o protocolo sanitario activado polo risco de posibles infeccións e afectacións.

O alcalde de Soutomaior, Manu Lourenzo, quen onte mantivo na base de Protección Civil en Soutomaior un encontro con parte dos voluntarios que se desprazaron ata Valencia, sinalou que o Concello puxo a disposición da agrupación Oitavén-Tea o material técnico necesario para desenvolver as tarefas que se lle encomenden, tal e como solicitan desde a Federación Española de Municipios e Provincias (FEMP) e a Federación Valenciana de Municipios e Provincias (FVMP).

Así, os seis efectivos de Protección Civil Oitavén-Tea levaron consigo un xenerador de electricidade, alargadeiras e regletas, focos e elementos de sinalización, palas, escobóns, mazas, machadas, garrafas de gasolina, extintores, cableado e ferramenta variada.

O alcalde Manu Lourenzo agradeceu a disposición dos e das voluntarias de Oitavén-Tea, que están xa en Valencia desde primeira hora da mañá, para participar no dispositivo técnico coordinado coas diferentes autoridades que están traballando na zona afectada. “Sabemos que están alí achegando todo o seu coñecemento e a súa experiencia de maneira útil, achegando o seu gran de área a arranxar o desastre provocado pola DANA”.

Neste sentido, Manu Lourenzo subliñou as numerosas mostras de solidariedade da veciñanza de Soutomaior. “Sentímonos moi orgullosos da resposta que están dando os nosos veciños e veciñas antes esta situación”, sinalou o alcalde, quen tamén fixo un chamamento á cautela e a actuar con responsabilidade. “Pregamos que se sigan as indicacións dos organismos oficiais situados no terreo e que toda a colaboración se faga unicamente a través destas vías”, concluíu o alcalde de Soutomaior.