Pontevedra ofrécelle á Deputación todas as facilidades para avanzar na rehabilitación de Santa Clara
![20-11-12-2020-11-12 09.39.12-santa clara](/asset/thumbnail,992,558,center,center/media/bngpontevedra/images/2020/11/19/2020111918505360362.jpg)
Mosquera saíu da comisión de seguimento do convenio sensiblemente máis satisfeito que da última reunión co vicepresidente Rafael Domínguez. Entón o goberno provincial non quería seguir adiante co proxecto elixido polo xurado, e incluso falaba de descartar a opción de Nieto Sobejano que finalmente aceptou eliminando a parte arqueolóxica. “A Deputación tiña dúbidas. Agora parece que houbo un cambio e se desatrancou todo, e rectificar é de sabios, hai que recoñecelo. Antes a indefinición era absoluta e agora xa está asinado o contrato con Nieto Sobejano”, subliñou, lembrando –iso si- que ata que o PP tomou a decisión de seguir adiante “perdéronse meses”.
A principal novidade do encontro foi que o Concello puxo sobre a mesa unha oferta formal para colaborar, ademais de coa cesión do conxunto do convento, tamén cunha achega económica de fondos municipais. Explicou Mosquera que tanto o presidente da Deputación na entrevista co alcalde do 14 de setembro do 2023, como despois cando se asinou o protocolo coa Xunta para achegar 6 millóns de euros, e en varias ocasións o vicepresidente Domínguez, invitaron ao goberno local a aumentar a súa participación económica, unha petición que non se contestara ata agora, dixo Mosquera, porque non se coñecían “exactamente” as posibilidades do Concello.
“Analizada a situación, falada co alcalde e co concelleiro de Facenda, explicou o concelleiro, hai vía libre para achegar máis cartos”, sen concretar unha cifra. Recoñeceu que “o Concello non ten o músculo económico que ten a Deputación”, pero asegurou que será factible facer como xa se fixo con outras obras como o Hospital de Montecelo. Afirmou Mosquera que se trata dunha “demostración de vontade de que se darán todas as facilidades para actuar” e salientou que os cartos poderían destinarse á renovación da zona verde ou tamén para efectivizar a conexión con Barcelos, as zonas de uso público.
Na reunión tamén se abordou a urxencia da licencia para as obras, que será necesaria unha vez o proxecto de Nieto Sobejano se entregue previsiblemente no mes de xuño. Por parte do Concello, apuntou Mosquera, pediuse que se fale cos técnicos municipais para que se vaia facendo o traballo de maneira eficaz e cos antecedentes necesarios, igual que se debe facer con Patrimonio “para evitar que chegue o proxecto e se lle atopen defectos que poidan ser corrixidos previamente”. Lembrou que con esta maneira de actuar, por exemplo, a licencia do Concello para reformar o Valle Inclán estivo lista en nove días cando tivo toda a documentación correcta.
Doutra banda, Mosquera abordou os prazos do convenio, no que se marcara ano e medio para entregar o proxecto e un total de catro anos para ter as obras rematadas. Destacou que o prazo do proxecto remata en xuño e co atraso que houbo dificilmente será posible telo en tempo e forma, igual que a licitación e as obras, pero sinalou que por parte do Concello non se van poñer problemas abríndose a unha prórroga realista.
A comisión de seguimento abordou tamén as entradas ao convento por Barcelos e a rúa Santa Clara. Mosquera confirmou a total dispoñibilidade para deixar que se actúe na zona verde e tamén na zona norte da praza, onde –dixo- “hai espazo suficiente ata o estacionamento para que se traballe nunha entrada digna e con accesibilidade, o grande problema que presenta o convento”.
Con respecto ás posibles solucións técnicas para o acceso, o edil subliñou que a cuestión é complexa. Lembrou que había unha proposta que están a axustar porque tiña tres arcos na metade do muro e Patrimonio dixo que era excesivo. Plantexou como alternativa atractiva para manter o carácter de Santa Clara non tocar o muro e entrar de maneira soterrada para chegar ao interior e ter a sorpresa do que hai alí dentro, “que é como funcionou sempre, coma unha cousa enclaustrada”. Sen embargo, subliñou, “é tan complicado dotar iso de accesibilidade que hai que axustar”, polo que deixou na man dos técnicos dar coherencia á solución definitiva.