O  23 de febreiro conmemórase o Día de Rosalía de Castro, coincidindo co nacemento  en 1837 da nosa poeta nacional. Con tal motivo o Concello de Pontevedra preparou unha programación oficial en colaboración coa Asociación de Escritores/as en Lingua Galega.

Símbolo do país, Rosalía continúa a ser un icona pop dentro do século XXI, a artista máis internacional e referenciada dentro da cultura galega, o que permite albiscar a importancia da súa figura e a necesidade de continuar a reivindicación da mesma.

O acto principal do Día de Rosalía sucederá ás 20 horas no centro social do Gorgullón, espazo que acollerá a lectura de textos de Cantares gallegos e Follas novas. Trátase dun acto aberto a toda a cidadanía, no que pode participar de xeito directo. Será conducido pola poeta Miriam Ferradáns, que tamén lerá o manifesto de AELG nesta data tan sinalada. Doutra banda, o colectivo artístico O Fruto e a serpe encargarase da ambientación do acto.

Para participar na lectura de textos é preciso enviar un correo electrónico a [email protected], indicando o nome completo da persoa que vai ler, se representa algún colectivo ou asociación e o texto escollido.

Desde a área de Normalización Lingüística, sinalan que a homenaxe centra nos textos rosalianos escritos en galego, para destacar o papel da autora na reivindicación do uso da lingua galega nunha época en que publicar en galego e sendo muller era un acto revolucionario. Ademais, a súa escrita pioneira abriu o camiño á literatura galega moderna.