Soutomaior, 23 de febreiro de 2024. Soutomaior, 23 de xaneiro. O Concello de Soutomaior sempre estivo á vangarda na defensa do noso idioma. Foi o primeiro concello en ter unha rúa co nome de Castelao, o primeiro en ter unha rúa co nome de Alexandre Bóveda e tamén o primeiro concello en ter unha ordenanza de Normalización Lingüística, unha ordenanza que se modificou no  ano 1999 e que foi aprobada por unanimidade no pleno da corporación. 

Esta situación convirte a Soutomaior nun concello de referencia na defensa do idioma e ante esta situación e cos últimos datos que se publicaron do uso do galego polo Instituto Galego de Estatística (IGE) que certifican que xa son máis os e as cidadáns que residen en Galiza falando sempre en castelán. Con estes datos sobre a mesa dende o concello de Soutomaior teñen claro a defensa do idioma, e por ese motivo, como sinalou o alcalde de Soutomaior, Manu Lorenzo,  “decidimos levar adiante unha campaña en positivo, transversal e cun toque de humor para poñer en valor todo o potencial que ten o noso pobo e todo o que podemos ser dende o galego”. 

Tal e como afirmou Manu Lourenzo “con esta campaña animamos a toda a veciñanza a Gozar do seu punto Galego nas artes escénicas, na música e no seu día a día e por iso levaremos adiante actividade e iniciativas de promoción do galego na administración pública, actividades de promoción de galego no ensino e actividades de normalización lingüística que traerán a Soutomaior algunhas das principais referencias artísticas do noso país que nos van  dar un punto en galego e animarannos a gozar dese punto G do idioma”. 

O Concello de Soutomaior impulsará accións a través das áreas que  proxectan e conectan directamente coa cidadanía impulsando o galego na escena, ofertando unha axenda municipal  na que se programarán espectáculos teatrais dirixidos ao público adulto, á mocidade e ao infantil familiar con propostas de grandes compañías como Talía Teatro, Excéntricas, Tarabela Creativa, Centro dramático galego; nos monólogos de Carlos Blanco, Isa Risco, Avelino González, Celsiño, Arantxa Treus cos que imos rir ou partillar propostas musicais coma as de Tino Baz que porán en valor a nosa música e todo o noso acervo lingüístico;  impulsando o galego no deporte, nos convenios coas entidades deportivas e nas promoción do deporte en galego; o galego na promoción económica, traballando conxuntamente co tecido económico no uso da lingua galega nos seus negocios e apoiando ao sector ofrecéndolles for-mación  que melloren as súas competencias lingüísticas na atención ao público en galego  para apostar polo valor engadido que supón a incorporación do galego na venda de produtos e dos servizos que prestan; o galego nas Tic  aumentado a creación de contidos en galego nos soportes dixitais e comunicativos do Concello pero tamén impulsando a creación de recursos en galego para compartir nas redes sociais; o galego no ensino e coa mocidade apoiando ao centros educativos na labor de transmisión da lingua, colaborando coas asociacións, organizando actividades de lecer  e de formación que fomenten o uso da lingua, etcétera