Caldas, 31 de marzo de 2026. O tenente de alcalde de Caldas de Reis, Manuel Fariña, solicitou hoxe ao Partido Popular un apoio claro, contundente, sen evasivas nin rodeos ao ‘Kalidas Primavera Fest’. O nacionalista fíxoo ante os intentos dos populares de desentenderse da recollida de sinaturas e do escrito en contra de celebrar o festival na Semana Santa entregado no Concello o pasado xoves. Fariña salienta que o PP local quixo abrir un novo capítulo de confrontación co goberno local mais “errou no seu movemento” e agora intenta cambiar de ‘chaqueta’ con ambigüidades. 

“Abrímoslle a porta ao PP para que realmente se posicione a favor de Caldas. Que diga directamente que apoia o ‘Kalidas’ se realmente quere desentenderse da campaña en contra”, insta Fariña, quen considera que, lonxe de respaldar a celebración, o comunicado oficial feito público polos populares esta fin de semana apenas di que apoia “eventos de calquera índole” sen facer mención expresa ao festival, e incide nas mesmas críticas ao Concello que o texto da recollida de sinaturas, volvendo falar de “constantes ataques” e “animadversión” do goberno local ao “sentimento relixioso” das e dos caldenses. 

Fariña subliña que dende o Concello organizouse o ‘Kalidas’ na  Semana Santa coa finalidade de potenciar o festival e facilitar a chegada de público. “Por moito que o PP queira facer ver outra cousa, nós non estamos aquí para ir contra nada nin contra ninguén. Temos absoluto respecto pola Semana Santa e polas crenzas de cadaquén. Estamos para facer de Caldas unha vila atractiva e dinámica, para encher as rúas de vida, para que a xente nova teña motivos para quedar… e para que Caldas siga medrando”, salienta.

O tenente de alcalde ratifícase en que a campaña de sinaturas contra o ‘Kalidas’ foi instigada polo Partido Popular agochando as súas siglas. Manifestando o seu total respecto polas persoas que asinaron de boa fe, Fariña subliña que foi unha manobra política dos ‘populares’ para intentar crear ruído e un novo episodio na confrontación contra o goberno local. 

Segundo o nacionalista, resulta “penoso” que o PP queira xustificar agora que non foi promotor da iniciativa dicindo que non se posicionou “publicamente” e que “as posicións oficiais son emitidas exclusivamente por representantes políticos”, cando o escrito de sinaturas está ratificado polo voceiro local e por xente moi próxima ao partido. Ademais, foi nos negocios desta contorna próxima ao PP onde se recolleron os apoios ao escrito de queixa. 

“En Caldas coñecémonos todos e todas. O que molesta é que se ‘destapara’ o pastel e que quedara en evidencia que o PP estaba detrás dunha iniciativa que apenas tivo 96 sinaturas. Por iso agora, que ven que non era o camiño, pretenden cambiar de chaqueta e facer como se non tiveran nada que ver, con ambaxes e medias verdades”, lamenta o tenente de alcalde. 

Fariña destaca que  “quen realmente divide e sementa lixo” é quen “ataca -ao ‘Kalidas’- e logo esconde a man, recuando e negando telo feito”. “Nós imos seguir poñendo todo a nosa enerxía, esforzo e dedicación para que Caldas siga avanzando. Esta vila non para”, finaliza.

PROGRAMA

Con respecto ao festival, Fariña subliña que se está xa a realizar a montaxe do  ‘Kalidas Primavera Fest’, que este ano cambia de nome e de formato, deixando atrás a denominación e organización habitual da ‘Festa da Primavera’. O xoves 2 de abril comezará coa mestura de ritmos de El Combo Dominicano, que traerá á súa dianteira de renome, incluíndo a Kenneth, o finalista do Benidorm Fest, e pechará con Groove Amigos, DMiron e Carlos López.

O venres será a quenda de Panorama, unha das orquestras máis recoñecidas no circuíto, cun escenario de 63 metros, un equipo de son impresionante e grandes pantallas que obrigarán ao Concello a reforzar o subministro eléctrico para cubrir as necesidades de enerxía. Dáse a circunstancia de que a orquestra vén de cancelar a actuación que tiña de pago no aparcadoiro de Chanteclair este sábado 28, polo que se prevé que parte da xente que contaba con esa cita achegarase a Caldas como alternativa. O ‘Kalidas’ rematará o sábado coa actuación de Orquestra Saudade.

Todas as actuacións serán ás dez da noite no aparcamento da Tafona, con entrada totalmente de balde.