Pontevedra, 12 de abril de 2024. Os membros da Comisión Europea ‘EU Road Safety Exchange’, que durante dos dúas visitaron Pontevedra para afondar e comprender os elementos que fixeron posíbel a transformación urbana, en especial aqueles aspectos relacionados coa seguridade viaria, resaltan que a cidade do Lérez é o futuro da seguridade viaria urbana. 

O alcalde de Pontevedra, que os acompañou nunha visita pola cidade, sinalou que esta visita formaba parte dun proxecto derivado da Comisión Europea ao redor da seguridade viaria, e lembrou, ademais, que Pontevedra foi galardoada co Primeiro Premio de Seguridade Viaria Urbana da Unión Europea, no ano 2020. 

“A impresión que eu teño, logo de conversar e falar con eles, e que consideran que Pontevedra é un bo exemplo non só na teoría, senón tamén na práctica”, explicou Lores. 

Así, o director da Axencia Europea de Seguridade Viaria, Antonio Avenoso, indicou que o proxecto EU Road Safety Exchange conta con financiamento do Parlamento Europeo, xestionado a través da Comisión Europea. “A idea do proxecto é doada: coñecer as boas prácticas nos países da UE e como aplicalas a outros países”, sinalou. “Temos 19 países involucrados e coñecíamos Pontevedra polo premio que lle foi outorgado, mais o que vimos aquí foi unha enorme sorpresa”. 

“Eu síntome coma nun soño. Pontevedra conta coa seguridade e a mobilidade viaria como debería ser en todos os países e cidades do mundo”, sentenciou. “Quero que todos os socios desta da Unión Europea poidan ver cos seus ollos o que Pontevedra fixo. Isto é o futuro da seguridade viaria urbana”. 

Avenoso destacou e subliñou como elementos máis sorprendentes a convivencia amábel entre peóns de todas as idades e os vehículos ou a mínima presenza de coches nas entradas dos colexios, que definiu como “impresionante”.