Pontevedra, 27 de novembro de 2025. O alcalde de Pontevedra, Miguel Anxo Fernández Lores, anunciou hoxe o acordo tomado en Xunta de Goberno Local no que se deu luz verde á licitación do que cualificou como "o maior contrato de rehabilitación de firmes da historia do concello de Pontevedra".

O investimento total ascende a 5.494.531 euros, e a actuación supón unha mellora substancial de todo o concello. Esta licitación atende ao compromiso do actual mandato de dar especial relevancia ao mantemento de todos os espazos públicos e do mobiliario urbano.

Este ambicioso proxecto abrangue a rehabilitación de 191.304,5 metros cadrados (m2) de viarios en todo o concello. Para ilustrar a súa magnitude, o alcalde indicou que a superficie total a rehabilitar equivale a 28 campos de fútbol.

O contrato está dividido en catro lotes principais, asegurando unha atención integral a todas as zonas do municipio:

• Zona Urbana Centro (L1): 49.977,3 m2 de actuación, cun investimento de 1.374.393 euros.
• Zona Urbana Exterior/Barrios (L2): 46.663,7 m2 de actuación, cun investimento de 1.373.452 euros.
• Zona Urbana Parques Empresariais (L3): 43.806,3 m2 de actuación, cun investimento de 1.372.605 euros. O alcalde resaltou especificamente que esta rehabilitación inclúe a totalidade dos viarios do Parque do Vao e do Parque do Campiño.
• Zona Non Urbana/Parroquias (L4): 50.857,2 m2 de actuación, cun investimento de 1.374.081 euros.

Este contrato, incluído na modificación de crédito, inicia xa o seu proceso de licitación. Unha vez adxudicado, o prazo de execución estipulado é de seis meses e medio.