Pontevedra, 2 de xullo de 2026. A Xunta de Goberno local do Concello de Pontevedra aprobou esta mañá o convenio de colaboración coa Universidade de Vigo para apoiar as actividades do Mestrado Universitario en Deseño e Dirección Creativa en Moda (Esdemga) durante as vindeiras catro anualidades. O acordo supón unha inxección total de 240.000 euros repartidos equitativamente ata o ano 2029. A achega municipal para o mestrado téxtil ascenderá a 60.000 euros anuais.

O alcalde, Miguel Anxo Fernández Lores, defendeu a transcendencia de manter estas liñas de traballo conxunto para facer medrar a cidade dende o ámbito educativo e o social. "Ter un campus especializado, creativo, potente e activo é fundamental para unha cidade dinámica como Pontevedra".

Centro público de atencion ao Alzhéimer

Paralelamente, o Concello aprobou a cesión do inmoble municipal de Pedro Sarmiento de Gamboa, número 5, á Xunta de Galiza para que siga destinado en exclusiva á atención terapéutica diúrna de persoas con demencias neurodexenerativas.

O alcalde destacou a importancia de dar estabilidade ao centro de Alzhéimer coa cesión por cincuenta anos para "non andar con complicacións burocráticas e dar seguridade absoluta ás familias e ás persoas usuarias".