Caldas, 15 de decembro de 2025.  Concello de Caldas de Reis Caldas vén de iniciar as obras no Pavillón Municipal de Deportes para crear os novos vestiarios e unha sala polivalente. Segundo anuncia o tenente de alcalde Manuel Fariña será necesario pechar as instalacións durante uns dez días para realizar o groso das demolicións, despois dos que a cancha volverá estar operativa de maneira inmediata: os clubs poderán retomar alí a súa actividade a vindeira semana e o alumnado dos colexios poderá utilizar a pista en condicións á volta das vacacións de Nadal. 

Fariña achegouse hoxe ata o equipamento deportivo para dar o ‘pistoletazo’ de saída da reforma xunto ao histórico conserxe das instalacións e o actual monitor deportivo. Alí, subliñou que a intención é minimizar molestias tanto á actividade deportiva xeral como aos colexios próximos, acordando coa empresa adxudicataria, a caldense ‘Decor Rede Rivas SL’, imprimir ritmo aos traballos co fin de acurtar o máximo posible o prazo de execución, que oficialmente é de catro meses.

O Concello advertiu con tempo aos clubs usuarios que durante esta semana non poderían adestrar nas instalacións e deu localizacións alternativas, xa que a previsión é que durante os primeiros días de traballo se realice a demolición da construción baixo a grada. Fariña destaca que o club de baloncesto, por exemplo, foi derivado ao Pavillón de San Clemente e para a semana xa volverá ao pavillón, posto que a pista volverá estar operativa. 

“Queremos simultanear obras e actividade na medida do posible, mais os traballos de demolición poderían supoñer un problema de seguridade pola maquinaria, o ruído e incluso a calidade do aire. Unha vez se tiren as paredes e tabiques necesarios, adecentarase a parte da cancha e xa se poderá volver a adestrar. Os vestiarios, obviamente, non estarán dispoñibles”, subliña o nacionalista.

Por outra banda, ademais de organizar as obras en dúas fases e dúas áreas diferentes de traballos, a adxudicataria intentará “relaxar a tensión acústica” e evitará ao máximo a actividade durante as horas docentes, estando en comunicación constante coas direccións dos centros de ensino próximos (CPI Alfonso VII e IES Aquis Celenis). A construtora comprometeuse tamén a utilizar os medios necesarios (secadoras industriais e sistemas de ventilación forzada) para axilizar as demoras de secado de morteiros e adhesivos pola humidade desta época.

Grazas á reforma, realizarase unha redistribución de todo o espazo que hai baixo as gradas do pavillón, renovando de maneira integral os actuais vestiarios, actualmente en mal estado de conservación, para facelos accesibles e funcionais. Melloraranse todas as instalacións de fontanería, saneamento, electricidade e ventilación cumprindo coa normativa vixente en materia de accesibilidade e sustentabilidade ambiental e aproveitarase o espazo restante baixo as bancadas do público para crear un novo espazo de usos múltiples que permitirá organizar un programa de actividades deportivas amplo.