Barro, 14 de novembro de 2025. O Concello de Barro aprobou o Orzamento Municipal para 2026, que ascende a 3.377.140 euros, un incremento de 130.640 euros respecto ao exercicio de 2025. Este orzamento destaca pola conxelación un ano máis de todas as taxas e impostos municipais, polo reforzo da política social, polo equilibrio económico e polo rigor na xestión do gasto público. 

Grazas a unha tramitación exemplar en tempo e forma, o orzamento poderá entrar en vigor o día 1 de xaneiro, garantindo unha planificación económica estable desde o inicio do exercicio e permitindo ao Concello programar con seguridade os proxectos e servizos para os veciños. 

Un dos aspectos máis relevantes do orzamento de 2026 é o investimento en Política Social, que acada unha partida de 864.000 euros, representando o 21% do total do orzamento municipal. Esta partida incrementouse en 120.000 euros respecto a 2025, reforzando os servizos de apoio ás familias, maiores e persoas en situación de vulnerabilidade. A prioridade do goberno local é garantir que todos os veciños teñan acceso a servizos sociais de calidade, promovendo a igualdade e a inclusión en todo o municipio. 

O alcalde de Barro, Xosé Manuel Fernández Abraldes, destacou que este orzamento é responsable, realista e pensado para protexer ás familias sen incrementar a presión fiscal. Engadiu que “desde 2020 Barro mantén débeda 0, e iso permítenos planificar con estabilidade, actuar con rigor e seguir priorizando ás persoas”. 

Abraldes subliñou tamén que o executivo local segue apostando por unha xestión seria e prudente, garantindo que os recursos municipais se utilicen de forma eficiente e que se manteñan servizos públicos de calidade. “O noso obxectivo é que os veciños poidan ver reflectido o seu benestar na vida cotiá, cun Concello estable e comprometido coas necesidades da comunidade”, afirmou o alcalde. 

Ademais da política social, o orzamento contempla partidas para o mantemento de infraestruturas, obras de mellora nos espazos públicos, programas culturais e deportivos, así como accións de desenvolvemento económico local. A planificación económica do Concello busca equilibrar todas as áreas de actuación, garantindo que os proxectos se executen con eficiencia e que os servizos básicos continúen ofrecéndose sen interrupción. 

A aprobación do orzamento supón tamén a consolidación dun modelo de xestión transparente e ordenado, que permite ao Concello planificar o futuro con solvencia e dar seguridade aos veciños sobre o destino dos recursos públicos. Ao manter a débeda cero e conxelar impostos, Barro segue demostrando que é posible combinar responsabilidade financeira e investimento social.