Caldas, 14 de novembro de 2025. O Concello de Caldas de Reis vén de brillar de novo nos Premios ‘Vilas en Flor’. A vila termal recolleu hoxe en Carballo tres ‘Flores de Honra’ pola xestión municipal que fai dos espazos verdes. Este número de galardóns revalida o número conseguido tamén o ano pasado na cita que organiza anualmente a Fundación Juana de Vega en colaboración coa Asociación de Viveiristas do Noroeste (ASVINOR) e a Asociación de Empresas de Xardinería de Galicia (AGAEXAR).

O tenente de alcalde Manuel Fariña destaca que Caldas está a consolidarse como referencia no traballo e aposta pola sustentabilidade, sendo dos municipios galegos que máis recoñecementos xunta nos últimos anos. 

Novamente, este ano o xurado destacou a xestión sostible para promover a biodiversidade de espazos realmente singulares como son o Xardín Botánico e a Carballeira. Púxose en valor, sobre todo, o ambicioso proxecto para a restauración de ambos espazos, que son unha icona para a vila, e que propoñen un acondicionamento integral desde un enfoque múltiple, coa idea de recuperar a esencia desta área tan singular, mellorando o seu atractivo e ofrecendo un valor engadido a maiores da súa historia e patrimonio singular.

Fariña destacou que as obras da Carballeira xa están en marcha. A restauración do espazo natural, que se adxudicou por preto de 740.000 euros, consiste principalmente na rehabilitación das especies vexetais, formacións e composicións botánicas, a mellora e adaptación de instalacións e equipamentos, así como na recuperación do patrimonio natural e cultural.

Entre as actuacións concretas a realizar, definidas polo arquitecto de paisaxe Pedro Calaza, está a mellora da biodiversidade, incorporando novas especies e reforzando máis exemplares de outras existentes. Vanse eliminar especies invasoras, recuperaranse as aliñacións coa estrutura orixinal do espazo, farase un tratamento para mellora a calidade cromática e escénica, crearanse composicións de bosquetes densos e laxos para recuperar o aspecto primixenio, así como estudos biomecánicos e fitosanitarios en exemplares particulares. Tamén se mellorará o solo para garantir un bo desenvolvemento das árbores e especies existentes. 

No caso das instalacións e equipamentos, haberá actuacións de mellora de pavimentos, e mobiliario, así como tamén das instalacións (bocas de rego, puntos de luz...), entre outras, instalando paneis explicativos con información relevante e de posta en valor do patrimonio natural e cultural. 

A intención é que a reforma global do espazo verde, xunto á apertura do Centro de Visitantes, no que se ofertará unha exposición para comprender e poñer en valor o BIC, poida ser unha realidade antes do verán de 2026.

O tenente de alcalde Manuel Fariña expresou a súa satisfacción tras recibir as 'Flores de Honra'. Subliñou que "este galardón é un gran estímulo para continuar coas nosas iniciativas”. "A valoración do xurado motívanos a seguir adiante, promovendo un espazo como a Carballeira que non só honra a nosa riqueza vexetal, senón que tamén convida á veciñanza e as persoas que nos visitan a gozar da natureza aproveitando toda a súa potencialidade", subliñou, poñendo tamén en valor o recoñecemento por outras labores ordinarias e proxectos nos espazos verdes da vila recoñecidos por Vilas en Flor.

As ‘Flores de Honra’ de Vilas en Flor concédense segundo o criterio dun xurado especializado, que está composto por profesionais voluntarias de recoñecido prestixio dos sectores do viveirismo, os centros de xardinería, a xardinería e o paisaxismo, o turismo, a cultura e outros ámbitos relacionados con este programa no país. Outórganse logo de analizar a memoria dos traballos proxectados polos gobernos locais e de que o xurado visite ‘in situ’ os municipios adscritos.