Barro, 29 de novembro de 2021. O Concello de Barro vén de aprobar a adxudicación dun proxecto integral para a mellora e conservación do parque da natureza Ría de Barosa, cun orzamento de 100.000 euros. 

Con este proxecto, o Goberno municipal quere realizar melloras en todo parque. A accesibilidade é unha das principais eivas na actualidade, polo que se mellorará a rampla de acceso á zona das fervenzas e construiranse ramplas para acceder á illa desde a zona norte. 

Ademais, realizaranse tarefas de:

• Silvicultura, con desbroces, corta de especies invasoras e plantación de árbores autóctonas
• Mellora nas sendas, nas zonas verdes no mobiliario e na sinalización
• Mellora nas zonas de aparcadoiro
• Creación dunha illa de reciclaxe 
• Construción de novos baños que alivien a sobrecarga que os existentes sofren nos meses de verán. 

O alcalde de Barro, Xosé Manuel Fernández Abraldes afirmou que "con esta actuación, o Goberno municipal quere mellorar aspectos que se foron deteriorando co paso do tempo e coa presión turística para consolidar este enclave natural como punto obrigado de visita para todas aquelas persoas que queiran gozar da natureza e do patrimonio".