26 de novembro de 2021. No Pleno do concello de Ponte Caldelas celebrado no día de onte no que tomaron posesión dos seus cargos os novos concelleiros do BNG, Sol Seoane e Xavier Lourenzo, aprobáronse as dúas mocións presentadas pola formación nacionalista: unha que facía referencia á mellora da sanidade pública en Ponte Caldelas -aprobada cos votos de BNG e PSOE- e outra sobre o incremento do tempo dado á veciñanza para a limpeza das franxas de seguridade -aprobada por unanimidade-.

Defensa da sanidade pública

O Pleno acordou dirixirse á Xunta para demandar a reposición, con carácter de urxencia, das vacantes médicas producidas no último ano en Ponte Caldelas, así como recuperar o servizo de pediatría a tempo completo.

Na exposición de motivos, Sol Seoane afirmou que a situación que está a padecer a sanidade pública ten un culpábel: “a política de acoso e derribo á que foi sometida polas políticas do PP desde a Xunta de Galiza durante os últimos 11 anos”. Neste sentido, sinalou á atención primaria como o ámbito da sanidade pública galega que con máis intensidade sufríu os recortes, con consecuencias moi graves: masificación nas consultas, cupos desbordados, redución de profesionais, non substitución de baixas e vacacións, etc.

A portavoz do BNG puxo sobre a mesa dous problemas graves: a non substitución dos dous facultativos que se xubilaron, e a redución do horario de atención pediátrica. Lembrou Sol Seoane que “foi o PP re Rajoy  quen aprobou a taxa de reposición que impedía contratar persoal na sanidade e nos servizos sociais con Feixóo como abandeirado, como alumno aplicado da medida ao longo dos anos da crise e que nos deixa unha sanidade pública nunha situación crítica e con menos persoal”.

Franxa de Seguridade

Por unanimidade, o Pleno acordou dirixirse a SEAGA, FEGAMP e Xunta de Galiza para demandar a ampliación do prazo de 15 días dado aos veciños e veciñas de Ponte Caldelas para que manteñan limpa a franxa de seguridade.

Sol Seoane informou que nos últimos días uns 800 veciños e veciñas están a recibir nas súas casas notificacións de SEAGA nas que se lle dá un prazo de 15 días para proceder á limpeza das franxas de seguridade, con ameazas de execución subsidiaria polo Concello e multas se non se procede á limpeza do devandito prazo.

A portavoz do BNG afirmou que todos e todas “concordamos na necesidade de manter limpas as franxas de seguridade para evitar posíbeis desgrazas no futuro, pero calquera que coñeza o monte en Ponte Caldelas e o funcionamento do sector madereiro sabe que en quince días é imposíbel dar cumprimento á devandita notificación, xa que ao traballo preciso hai que engadirlle a solicitude de permisos para a saca de madeira, e o efecto “onda” que leva a numerosos veciños e veciñas a demandar os traballos forestais e de silvicultura ante a escaseza de empresas que poidan facer ese traballo nese tempo”. Ademais -salientou- “hai que ter en conta que estamos nunha época do ano na que os incendios forestais son escasos e non teñen a forza nin o perigo que poidan ter no verán polo que o prazo pódese ampliar a tres meses sen que cause maiores problemas”.