Caldas, 9 de outubro de 2025. O Concello de Caldas vén de comezar a colocación das luces de Nadal para telas preparadas para o acendido oficial previsto na última fin de semana de novembro. Segundo o tenente de alcalde Manuel Fariña, este ano haberá novos elementos e deseños sorprendentes que farán da vila “un espectáculo” durante as festas. 

Con esta anticipación, Fariña destaca que a Concellería de Cultura e Festas quere ter todo preparado para dar a benvida á tempada do Nadal, creando un ambiente festivo e acolledor para todas as veciñas, veciños e visitantes. Está previsto realizar unha festa de acendido, como xa se celebrou o ano pasado, con música e sorpresas.

Segundo o contrato coa empresa ElectroMiño, ao pulsar o botón do aceso, iluminaranse preto de medio millón de luces micro LED repartidas en arcos e elementos decorativos ao longo de rúas e prazas, cun consumo enerxético que supera os 15.000 watios de potencia pero que resulta eficiente e ambientalmente sustentable pola tipoloxía das luminarias. 

Fariña destaca a importancia de engalanar a vila durante as festas do Nadal co fin de facela atractiva, esperando que as luces e decoracións atraian á xente para gozar das rúas e prazas, ao mesmo tempo que fomenten as compras no comercio local. Como xa é habitual, a intención é manter acendidas as luces ata o día de Reis. 

Ademais, a decoración das luminarias complementarase coa iniciativa do ‘Concurso de Decoración de Rúas Do Nadal’, que por terceiro ano consecutivo repartirá vales de compra nos establecementos do comercio de Caldas.