Caldas, 18 de xuño de 2024. Os Orzamentos do Concello de Caldas de Reis reflicten, en palabras do Tenente de alcalde e responsábel de Cultura e Deporte, “unha aposta sen precedentes pola educación, a cultura e o deporte na vila termal”, que permitirá aos distintos colectivos realizar as súas actividades cun respaldo económico firme por parte da institución municipal. 

O nacionalista indicou que unha das partidas máis destacadas nestes orzamentos é a referida ás transferencias de capital ás diferentes entidades sociais, culturais e deportivas, que realizan no seu día a día un importante labor na promoción do deporte e da cultura, ademais de organizar diferentes actividades que contribúen a dinamizar as nosas rúas e prazas. Un labor que o goberno municipal non só valora e recoñece, senón que quere apoiar de xeito decidido para que estes colectivos contribúan aínda máis se cabe a facer de Caldas un concello de referencia. 

O tenente de Alcalde detallou algunha das partidas máis importantes como os 19.000€que o goberno municipal transferirá ás ANPAS dos diferentes centros educativos da vila, cos que poderán financiar unha parte moi importante do Plan Madruga, así como realizar ludotecas de continuidade e diferentes actividades durante o curso escolar. Destacou tamén os máis de 70.000€ cos que o Concello de Caldas apoiará a actividade dos diferentes clubes deportivos e que contribuirán a que Caldas sexa sede entre outros moitos eventos de diferentes torneos deportivos de fútbol, tae- kwondo, salvamento e socorrismo que se sumarán a probas doutras disciplinas como o Trail Running, o ciclismo ou as carreiras de orientación. 

Destaca Fariña tamén o apoio á Banda de Música Municipal de Caldas, que este ano representará ao concello no Certame Internacional de Bandas de Música “Ciutat de Valencia” e que contará con unha aportación municipal de 10.000€. 

Con respecto ás subvencións ás diferentes Asociacións Culturais sen ánimo de lucro, Fariña quixo destacar tamén que a aprobación deste Orzamento municipal contempla unha cifra récord para estas entidades, ao contar cunha partida orzamentaria de 30.000€ que facilitará que estes colectivos programen diferentes actividades durante o ano tanto na vila como no rural, contribuíndo deste xeito á dinamización do espazo público e dos diferentes locais socias cos que conta o noso concello.