Caldas, 13 de xaneiro de 2026. O Concello de Caldas, seguindo a súa política de mellora das instalacións municipais, vai construír un novo espazo deportivo nas Corticeiras de máis de 3.800 metros cadrados. Segundo explica o tenente de alcalde e responsable de Deportes Manuel Fariña, o proxecto, que ascende a máis de 224.000 euros de orzamento, incluirá tanto novas instalacións complementarias ao actual campo de fútbol como tamén unha nova zona verde.

Fariña explica que a actuación pretende modernizar e complementar o actual equipamento dando resposta a unha demanda histórica do equipo de fútbol. A intención é crear unhas novas instalacións que permitan tanto á base como ao equipo principal adestrar e realizar outras actividades fóra do campo principal. “ O noso obxectivo é dotar dunhas instalacións modernas e completas recuperando un espazo de titularidade municipal que está actualmente moi degradado”, subliña o nacionalista.  

A actuación consistirá en reformar unha superficie total de 3.824 metros cadrados. Máis da metade, 2.014 metros cadrados, destinaranse á creación dun espazo polideportivo auxiliar ao campo de fútbol. O resto do terreo, 1.810 metros cadrados, que agora mesmo está cheo de escombros, maleza e presenta un grande desnivel, será obxecto dunha mellora ambiental. 

Segundo explica Fariña, o Concello de Caldas quere aproveitar a necesidade do equipamento para converter a zona nun lugar confortable, limpo e amable para as veciñas e os veciños, así como para as persoas visitantes. “Para iso, vaise promover a creación dunha zona verde na contorna do Umia, que comunica o paseo fluvial coa futura zona polideportiva de As Corticeiras. Así poderase acceder ás novas instalacións camiñando dende a vila”, apunta Fariña.

Os traballos incluirán a limpeza e roza do terreo, así como a nivelación da parcela á cota necesaria, construíndo un muro de contención para estabilizar o noiro de terra existente. As instalacións deportivas contarán coa súa correspondente rede de pluviais, de abastecemento e alumeado. Na zona de axardinamento plantaranse diferentes especies arbóreas de medio porte propias da contorna así como de céspede. O orzamento total será de 224.348 euros, e financiarase tanto con fondos propios municipais como coa axuda do III Plan de Infraestruturas Deportivas da Deputación, cuxa achega xa está confirmada.

Cabe lembrar que o campo de fútbol das Corticeiras, que agora disporá do espazo anexo de adestramento, xa foi obxecto de mellora nos últimos exercicios. Recentemente renovouse a iluminación, máis potente e uniforme sobre o terreo de xogo, e instalouse unha ampliación da cuberta para as gradas pola parte traseira para garantir unha protección total do público fronte ao vento e a chuvia.

O tenente de alcalde Manuel Fariña destaca que a execución de todos estes traballos supón na práctica unha mellora integral do campo. Destaca que As Corticeiras é utilizado a diario por centos de deportistas e acude numeroso público, polo que o obxectivo “é conseguir a máxima calidade e confort nas instalacións, algo que está a facerse realidade”.