Valga, 16 de xaneiro de 2026. O BNG, a través do deputado Luís Bará, presentará unha iniciativa no Parlamento Galego, esixindo á Xunta de Galiza actuacións urxentes na estrada PO-548 en Valga. Esta estrada, pertencente á Rede Primaria Básica da Xunta de Galiza, sofre unha alta sinistralidade polo que a iniciativa ten como prioridade a redución desta, principalmente no Alto de Cordeiro,  o tramo máis perigoso desta vía, e no que desde hai anos se veñen rexistrando numerosos accidentes, froito dunha combinación de factores que non están a ser corrixidos pola Xunta, administración responsable da estrada. 

O Alto de Cordeiro é un tramo marcado por curvas perigosas e cruces mal resoltos, aos que se suma unha falta de mantemento respecto da roza e limpeza das marxes, unha situación que se repite ano tras ano e que converte este lugar nun auténtico punto negro na estrada PO-548. A vexetación sen rozar invade as marxes da estrada, soltando restos na propia calzada. Este feito é especialmente perigoso despois de episodios de chuvia ou vento, no que estes restos quedan espallados sobre o asfalto reducindo a adherencia dos vehículos e incrementando o risco de saídas de vía, especialmente nas curvas. A acumulación de pólas contribúe tamén dificultar a visibilidade, aumentando de maneira directa a sinistralidade neste tramo. 

A perigosidade deste punto vese agravada tamén pola presenza habitual de fauna salvaxe, sen que existan medidas eficaces de prevención. Só coa sinalización non abonda para garantir a seguridade viaria, polo que se solicitará a aplicación de medidas complementarias como o valado de marxes nos puntos máis afectados e a realización de labores de limpeza da vexetación existente nas marxes da estrada. 

O Alto de Cordeiro ten numerosos accesos a equipamentos públicos e espazos de uso intenso como o colexio Xesús Ferro Couselo, o tanatorio, o pavillón ou o ximnasio, ademais de servir de acceso tamén para a Igrexa Parroquial de Cordeiro ou o xacemento arqueolóxico da Igrexa Vella. A estes tamén se engaden os accesos ao miradoiro do Monte de Beiro, que, sumados cos anteriores, xeran unha alta intensidade de tráfico nas estrada municipais que comunican coa PO- 548. 

Cómpre salientar tamén a existencia de cruces especialmente conflitivos como o de Beiro e o do Camiño Real, onde recentemente se realizou un desmonte sen que se acompañase dunha solución integral de seguridade viaria; así como o cruce superior cara a Vilar, que continúa presentando importantes problemas de visibilidade, e que requiren dunha revisión técnica profunda e actuacións específicas. 

Máis alá do Alto de Cordeiro, a estrada PO-548 continúa acumulando deficiencias graves como acontece na Recta de Campaña, onde algunhas beirarrúas están levantadas e moi deterioradas, polo que supoñen un risco evidente para as persoas. A falta de mantemento dos espazos axardinados e das rotondas xeran un deficiente estado das marxes, así como as cunetas e os sumidoiros de pluviais sen limpar que orixinan asolagamentos durante episodios de chuvia. 

A esta situación de abandono súmase un feito especialmente preocupante, que é que a PO-548 é unha das estradas con maiores niveis de contaminación acústica de toda Galiza, segundo os Mapas Estratéxicos de Ruído elaborados pola propia Xunta. Iso afecta directamente á saúde e á calidade de vida da veciñanza que vive na súa contorna e que tamén precisa de medidas que atenúen a elevada contaminación acústica. 

Por todo isto, "reclamaremos á Xunta de Galiza actuacións inmediatas e planificadas que inclúan a roza e limpeza periódica das marxes da PO-548, intervencións específicas nas curvas máis perigosas do Alto de Cordeiro, medidas de prevención fronte á fauna salvaxe, melloras reais nos cruces e accesos, así como un plan de mantemento integral e continuado desta vía. A seguridade viaria non pode seguir dependendo da inacción, tanto da Xunta de Galiza como do goberno municipal de Valga. A estrada PO-548, especialmente no Alto de Cordeiro, precisa solucións urxentes e a Xunta ten a obriga de actuar", afirmou o portavoz municipal, Fran Devesa.