Pontevedra, 20 de febreiro de 2021. Cargos do BNG participaron hoxe nun acto de denuncia da aldraxe da AP9 no que esixiron ao goberno central a baixada inmediata das peaxes da AP9 e o cumprimento do acordo de investidura que prevé 4 actuacións en relación coa autoestrada:

• Unha bonificación substancial das peaxes, cando menos coa gratuidade na viaxe de volta para persoas usuarias recorrentes
• A compensación con cargo aos orzamentos do Estado das subas extraordinarias derivadas das obras de ampliación da ponte de Rande
• A supresión da peaxe entre Redondela e Vigo
• A transferencia da AP9 a Galiza

Cómpre lembrar que foi o voto decisivo do deputado do BNG Néstor Rego o que permitiu arrincarlle literalmente este acordo histórico ao PSOE, un acordo que rompe con décadas de subas abusivas das peaxes e que abre a porta a que esta infraestrutura sexa xestionada desde Galiza.

Segundo afirmou o deputado nacionalista Luís Bará, “non hai razóns para que se demore a aplicación destes acordos e, en todo caso, consideramos que se debe contemplar a aplicación retroactiva desde o 1 de xaneiro”.

Para reclamar o cumprimento do pacto e para acabar coa aldraxe da AP9, o BNG está a desenvolver unha campaña en todo o país que inclúe actos simbólicos, colocación de faixas e carteis. Paralelamente estase a desenvolver unha campaña explicativa e de denuncia dos beneficios multimillonarios obtidos tanto pola concesionaria como polo Estado, “os grandes beneficiarios do atraco diario que sofren as 20.000 persoas que utilizan a autoestrada”, segundo Luís Bará.

Para o deputado nacionalista, “a concesionaria leva ingresados máis de 1.000 millóns de euros de beneficios desde a privatización en 2003 aprobada polo PP de Aznar; mentres que o Estado obtivo máis de 2.300 millóns, dos cales 1.586 son resultado da privatización e máis de 700 proveñen dos ingresos fiscais por IVE e Imposto de Sociedades”

Bará afirmou que “O Estado non nos fai ningún favor: o que ten que facer é devolver parte do multimillonario negocio da AP9, do que é “socio” con AUDASA”.

Bará afirmou que “O Estado non nos fai ningún favor: o que ten que facer é devolver parte do multimillonario negocio da AP9, do que é “socio” con AUDASA”.

A campaña do BNG ten como obxectivo acabar cos abusos e co espolio da AP9, que para máis INRI está sendo explotada por fondos de investimento especulativos con sede en Canadá, Holanda e Reino Unido.

Segundo Luís Bará, “o BNG persegue un trato xusto para Galiza, que xa pagou de abondo a autoestrada e que vai ter que seguir pagando, se non lle poñemos remedio, até 2048, mentres que outras autoestradas da mesma época como a A7 entre Alacant e a fronteira francesa será gratuíta neste ano 2021. Por iso, o BNG vai seguir pelexando ate conseguir, máis pronto ca tarde, unha AP9 galega e libre de peaxes”.