Pontevedra, 31 de marzo de 2025. Xa está aberto o programa de actividades do programa Apego para esta primavera, con actividades dirixidas ás nais e pais e demais titores e titoras, co fin de darlles a coñecer recursos que sirvan para activar ou enriquecer a lingua que se fala en familia coas crianzas, e tamén para promover espazos de socialización en galego para as familais con nenas e nenos ata seis anos —as actividades levan a referencia das idades para as que están recomendados os contidos—. 

Deste xeito, o programa consta de distintas actividades en diferentes espazos da cidade, con opcións de 0 a 6 anos. Hai obradoiros para aprender dar arrolos, xogos, contos, ou para experimentar coa cianotipia. Pecharase o 10 de xuño coa festa das Brincadeiras Miudiñas de Cé Orquestra Pantasma. 

Ademais, tamén se inclúe un ciclo de actividades fóra da cidade, en distintas parroquias, para familias con crianzas a partir de 3 anos: Un pobo con historia de seu. Estas sesións estarán guiado por Ab Origine Antropoloxía e por Polo Correo do Vento, coa música de Marcelo Dobode. Cada sesión constará dunha pequena explicación de carácter antropolóxico sobre o tema da sesión, un conto, unha sesión guiada de debuxo e un pequeno obradoiro para realizar en familia. 

Todas as actividades son de balde, mais cómpre inscribirse previamente a través da web do concello de Pontevedra, pois o número de prazas ofrecidas é limitado.