Pontevedra, 3 de outubro de 2025. O concelleiro de Xuventude, Demetrio Gómez presentou a 27 edición de Noites Abertas e con ela a apertura da convocatoria para presentar propostas de actividades que estará aberta até o 31 de outubro. O programa de actividades 2026 desenvolverase entre o 30 de xaneiro e o 28 de marzo. “Facemos un chamamento a empresas, asociacións, clubes, persoas autónomas, etc. que traballen no eido da xuventude a que participen neste programa para a mocidade”, salientou Demetrio Gómez. 

As características das actividades que se desenvolverán na 27 edición de Noites Abertas son: 

• Actividades de fin de semana (venres e sábados)
•  Interiores e exteriores. Preferencia actividades interiores debido á climatoloxía
• Inscrición só para algunhas das actividades exteriores que requiran desprazamentos
• Diversas, accesibles, gratuítas e plurais. É un programa para todos os gustos e onde todas as temáticas teñen cabida. 

Os proxectos que se presenten teñen que ter en conta a poboación á que está destinada: mocidade entre os 12 e os 30 anos. Todo o rango de idades ou algún treito concreto. O número de sesións que se poden propoñer serán de unha a catro, e a duración das sesións será de 2 horas máximo e 1 hora mínimo.

Os espazos de celebración serán: CEIP Froebel, Casa Azul, Local de Música, Pavillón Multiusos, Campos de Herba sintética da Xunqueira e prazas da cidade. E os horarios serán entre as 20:00 e as 00:00 horas.

Rematado o prazo, a coordinación do programa Noites Abertas seleccionará as propostas de actividades en función dos criterios establecidos. A comunicación dos proxectos seleccionados realizarase a partir do mes de novembro de 2024. 

Os criterios para selección de propostas son os seguintes: 

• Interese para a mocidade Teranse en conta as avaliacións doutras edicións para valorar o interese das actividades propostas.
• Actividades de lecer educativo Construtivas, lúdicas e participativas; que teñan que ver coa promoción da igualdade, da cultura galega, da saúde, a interculturalidade, arte, música, gastronomía, xogos, medioambiente...
• Viabilidade e inclusión que se adapten a unha participación activa e inclusiva
• Actividades interesantes para a xente nova

O formulario para presentar as propostas atópase en noitesabertas.gal