Pontevedra, 3 de xuño de 2026. A Concellaría de Xuventude, xestionada por Demetrio Gómez, presenta unha nova iniciativa formativa dirixida a profesionais do ámbito sociocultural, do lecer e do tempo libre: unha charla informativa sobre a eclipse solar do próximo 12 de agosto.

A sesión será o sábado 6 de xuño de 11.00 a 13.00 horas na Casa da Luz e estará impartida por persoal da Asociación Astronómica Sirio. O obxectivo é ofrecer aos mediadores e mediadoras as ferramentas necesarias para actuar como axentes de difusión deste evento extraordinario, garantindo un visionado seguro e evitando riscos de lesión, especialmente nos máis pequenos.

Durante a actividade repartiranse lentes homologadas para a observación directa da eclipse, e tamén se ensinará a confeccionar unha caixa de observación indirecta. Con estes dous métodos, os participantes poderán deseñar e coordinar actividades nos seus campamentos ou obradoiros, promovendo a participación cidadá nun evento único que se repetirá en 2027 e 2028.

As persoas interesadas poden inscribirse enviando un correo a xuventude@pontevedra.gal indicando nome completo, entidade (se pertence a unha asociación ou empresa de ocio), teléfono de contacto e correo electrónico.