Pontevedra, 19 de xuño de 2026. A edil de Deportes, Anabel Gulías, presentou hoxe a segunda edición do torneo internacional de balonmán Interpontes, un evento de primeiro nivel que se celebrará na cidade os vindeiros 13 e 14 de agosto. Este gran evento deportivo consolidarase grazas á iniciativa da Concellería de Deportes e á histórica colaboración e xenerosidade dos dous grandes clubs da cidade, o Teucro e o Cisne, que traballan conxuntamente na súa organización.

Durante a rolda de prensa, Gulías amosouse moi satisfeita de chegar a este punto e subliñou que, para o Concello, o balonmán é unha "referencia deportiva imprescindible". A concelleira lembrou que historicamente este deporte encheu o pavillón con equipos de altísimo nivel e reafirmou o esforzo do goberno local por darlle ao balonmán o lugar que merece na cidade.

A edil quixo agradecer publicamente a xenerosidade do Cisne e do Teucro por saber entenderse e fusionar enfoques para facer realidade este proxecto. "O que si teño présa é porque Pontevedra volva ser unha referencia no balonmán a nivel galego, a nivel estatal e, por suposto a nivel internacional e creo que o estamos conseguindo paso a paso", afirmou Gulías.

Nesta segunda edición, o Torneo Interpontes dará un salto de calidade extraordinario traendo á cidade a equipos de nivel "Champions". O cartel contará coa participación do Veszprém — considerado un dos catro ou cinco mellores equipos do mundo—, o Porto, o Cangas e o equipo local, o Cisne. Esta aposta vai na liña da ambición de futuro da organización: chegar a traer a Pontevedra ao "top 10" dos clubs europeos, como podería ser o Barcelona en vindeiras edicións.

Ademais do espectáculo deportivo de primeiro nivel no Pavillón Municipal, o evento buscará involucrar a toda a cidadanía a través dunha "fanzone" na parte dianteira do recinto. Grazas á colaboración coa Federación Galega de Balonmán, a organización está a traballar para incluír un torneo de balonmán 5x5 pola mañá para os máis pequenos. O obxectivo destas actividades paralelas con rapaces e familias é fomentar a canteira e xerar un gran ambiente arredor do torneo.

As persoas afeccionadas poderán consultar proximamente todos os detalles sobre a competición, a información dos equipos, os prezos e a venda de abonos e entradas a través da páxina web do torneo. Ademais, levarase a cabo unha campaña de difusión en localidades veciñas como Vigo e Cangas para atraer a toda a afección do balonmán galego.