Pontevedra, 24 de setembro de 2025. Logo do éxito dos ciclos Ponteatro e Domingos no Principal, a programación cultural de Pontevedra complétase coa chegada de “Teatro de Barrio”, unha nova aposta polas artes escénicas locais. Este ciclo presentará seis espectáculos a cargo de diversas compañías do concello, ofrecendo unha variada selección de comedias que van dende o costumismo ata o humor negro. 

O ciclo comezará o xoves 25 de setembro coa obra "Historias da Illa", unha comedia costumista e reivindicativa que conecta o presente co pasado recente da Illa. A peza, representada por un grupo interxeracional con actores de 10 a 80 anos, narra como unhas mozas, a través dun traballo escolar, toman conciencia da historia local ao conversar cos maiores no Parlamento, un espazo de encontro e charla. 

A programación continuará coas seguintes propostas: 

Mércores 24 de setembro: "Ai avoa!", da man de Desfeita Teatro. Unha comedia de humor negro que retrata unha familia de clase traballadora en decadencia económica e moral por culpa da “crecente voracidade da avoa”. A obra é unha crítica social que utiliza o humor para expoñer o egoísmo, a indolencia e a perda de valores. 

Venres 26 de setembro: "O marabilloso mundo de Oz", polo grupo Ilusionistas. Unha proposta de teatro familiar e musical que narra unha historia de crecemento e superación persoal. A obra destaca valores como a forza da amizade e a importancia de vencer os medos en boa compañía. 

Mércores 1 de outubro: "Os veciños do lado", da compañía Fauna 113. Unha cea de cortesía entre dúas parellas veciñas convértese nun encontro disparatado cheo de dobres intencións e segredos inconfesables. 

Xoves 2 de outubro: "Prescripción facultativa", a cargo de Amileños. Unha comedia familiar onde os fillos dunha matriarca manipuladora artellan un plan para rematar coa súa tiranía, o que provoca un cambio radical na nai con inesperados «efectos secundarios».
• Venres 3 de outubro: "Feliz aniversario", a cargo de Teatro Xenio, a compañía máis antiga de Pontevedra con 50 anos de traxectoria. Unha comedia de enredo centrada nunha familia con plans paralelos e incompatibles durante a celebración dun aniversario onde o champaña xa está servido. 

Con esta iniciativa, Pontevedra reafirma o seu compromiso coa cultura de proximidade, ofrecendo aos seus veciños e veciñas unha completa e diversa oferta teatral nos vindeiros meses.