Pontevedra, 7 de outubro de 2025. O concelleiro de Infraestruturas, César Mosquera, subliñou a necesidade de estudar todas as posibilidades e ir á raíz do problema dos anegamentos nas rúas contíguas en rúas como Fernando Olmedo, antes de acometer intervencións. 

O edil lembrou que a zona presenta moitas “arestas", xa que historicamente o río desauga onde actualmente existen edificios na canle, desembocando todo no antigo Estadio da Xuventude (CGTD). Por iso, antes de actuar, é fundamental ter a máxima información posible e un diagnóstico completo para evitar repetir actuacións que non funcionaron no pasado. 

Mosquera presentou os resultados do estudo encargado polo Concello sobre a posibilidade de instalar un tubo de evacuación de augas por José Malvar. 

Os cálculos técnicos revelaron que, debido ás extensas canalizacións existentes (Fenosa, Telefónica, auga de Ence, etc.), o máximo diámetro de tubo que se pode pasar é de 1,2 metros. Tras realizar os cálculos hidráulicos, determinouse que o caudal máximo para un período de retorno de 100 anos (o que se estima nos peores escenarios) é de 15,68 metros cúbicos por segundo (15.680 litros por segundo). Porén, a tubería de 1,2 metros, para ser colocada por riba da marea e das conducións existentes, só podería sacar un máximo de 570 litros por segundo (0,57 m3/s). 

"Isto quere dicir que non hai posibilidade de pasar un tubo que sirva de solución definitiva”, afirmou Mosquera. O concelleiro aclarou que a obra, valorada en aproximadamente 1,246 millóns de euros, podería servir unicamente como obra complementaria no futuro, pero non como solución principal. Mosquera tamén aproveitou para aclarar que o Concello nunca presentou esta tubería como a alternativa única, senón como unha posibilidade a estudar, en contraste con declaracións doutras forzas políticas.

César Mosquera explicou que os cálculos achegan a posibilidade de canalizar un tubo de 1,2 metros di diámetro por José Malvar, mais esta acción non resolvería o problema, só axudaría como unha medida complementaria 

O Concello de Pontevedra segue traballando conxuntamente con Augas de Galiza, organismo especializado que está a realizar os seus propios estudos. Augas de Galiza está ollando arquetas arredor do CGTD e ten máis facilidade para acceder e inspeccionar as canalizacións internas nesa zona. 

• As outras dúas posibilidades que se están a analizar son: 
• A construción dun ‘encoro’ na urbanización de Valdecorvos (zona alta), onde hai espazo libre suficiente. Este estudo está a ser realizado por Augas de Galiza.

A análise da zona verde xunto ao Camiño Vello de Castela para estudar a posibilidade de facer un estanque ou rebaixe de terreo que sirva para reter auga superficial, especialmente cando a marea está alta. O concelleiro sinalou que se o problema principal é a auga superficial que cae nas rúas, esta opción si podería ser valiosa.

Mosquera concluíu que se está á espera dos resultados dos cálculos e do diagnóstico de Augas de Galiza, que se agarda ter "en pouco tempo, unhas semanas". O obxectivo é determinar a orixe exacta e as cantidades de auga que causan o problema (se son de rebote ou superficiais) para atopar unha solución que, se non é totalmente definitiva, sexa polo menos "máis ou menos efectiva".