Pontevedra, 3 de abril de 2025. A concellaría de Servizos urbanos básicos iniciou a substitución dos ficus da rúa Rodríguez Seoane por magnolias, unhas especies máis acaídas para os espazos urbanos, que darán vistosidade e luminosidade ás rúas, e continuará pola rúa Losada Diéguez. 

Nestas dúas rúas da cidade están plantados ficus, un exemplares cun porte excesivamente grande (os ficus chegan a medir até 15 metros de altura), moi podados na parte baixa para evitar que as pólas molestasen aos viandantes e ás vivendas e unha copa escasa tamén moi podada polos mesmos motivos e non cumpría os obxectivos de sombra que se busca coas árbores urbanas. Ademais, o sistema radicular estaba a causar problemas nas beirarrúas e nas calzadas. A Concellaría estimou que eran exemplares non acaídos para este ámbito urbano, e substituiranse por 15 magnolias de folla caduca (8 en Rodríguez Seoane e 7 en Losada Diéguez) localizados nas mesmas escavas dos ficus. Darán maior vistosidade ás rúas coas súas flores (semellantes á praza de San Xosé) e unha sombra suficiente para poder refrescar o ambiente no verán pero tamén para deixar pasar o sol. 

Estas substitucións son a continuidade das realizadas a pasada primavera no barrio dos Salgueiriños e na rúa Rafael Dieste, tamén no barrio de Loureiro Crespo, nos que tamén estaban plantados ficus de grandes dimensións que causaban moitos problemas a viandantes polo levantamento das rúas así como aos veciños nos que as pólas entraban nas súas fiestras.