Pontevedra, 1 de abril de 2015. Coa boca amordazada, membros de Galiza Nova informaron das consecuencias da Lei de Seguridade Cidadá entre a mocidade de Pontevedra. As mocidades do BNG denuncian así “o atentado contra os dereitos básicos e liberdades que entraña a Lei Mordaza”, dixo Alberte Mera, Secretario Xeral de Galiza Nova, perante esta lei aprobada no Congreso polo PP e que comezará a aplicarse a partir do 1 de xullo. O responsábel comarcal de Galiza Nova na comarca de Pontevedra, Alberte Fernández, afirmou que “a intencionalidade do PP é calar a mocidade galega e a contestación social” e recordou que o BNG e Galiza Nova mobilizáronse durante os pasados meses contra esta lei e o BNG votou en contra dela no Congreso “porque consagra o estado policial co obxectivo de silenciar e amordazar a crítica, denuncia e mobilización social”.

Situados na Praza da Peregrina coa boca amordazada en sinal de protesta, membros de Galiza Nova repartiron a mocidade información crítica sobre as actividades que pasan a ser delito e a contía da sanción coa que serán penadas. As mocidades nacionalistas informan que participar en manifestacións en espazos coma campus universitarios e hospitais será castigado con até 600.000€, e convocar e participar dunha asemblea en espazo público de 100 a 600€. “As compañeiras e compañeiros de Galiza Nova e do BNG, que teñen paralizado desafiuzamentos, pasarán con esta lei a seren delincuentes, cando os delincuentes son os corruptos desalmados que deixan na rúa a 7 persoas cada día na Galiza” afirmou Alberte Fernández, que informou que tentar impedir un desafiuzamento suporá unha sanción de 600 a 30.000€.

Gravar a policía, desobediencia ás forzas do estado, ocupar unha sucursal bancaria, son outras das actividades sancionábeis, así como manifestarse perante o Parlamento Galego, o Congreso ou Senado españois ao que se estipulan até 600.000€.

Legalízanse, segundo informa Galiza Nova, as listas negras de manifestantes, militantes nacionalistas, activistas, sindicalistas, feministas, estudantes, xornalistas… “sempre estivemos nas listas negras, pero é o colmo que agora sexan legais!” afirmou Sabela Bará, para quen outro gran inconvinte son as taxas xudiciais para recorrer a sanción económica e administrativa, pois dependerá de maneira proporcional á contía da multa