Caldas, 1 de xuño de 2026. O reformado Botánico de Caldas está a xerar grande expectación. A primeira fin de semana tras a inauguración institucional do pasado venres foi un total éxito, con centos de persoas que desbordaron as actividades da xornada aberta do sábado, e que aproveitaron o domingo para coñecer o espazo rehabilitado xa por libre. O tenente de alcalde Manuel Fariña amosou a súa satisfacción pola resposta da cidadanía ante o novo “Xardín da Galiza, un lugar que forma parte da identidade da vila de Caldas e que está concibido para vivir, convivir e gozar”.

Fariña puxo en valor o amplo programa de actividades organizado polo Concello, que permitiu coñecer os novos espazos do Botánico e da Carballeira a través de visitas guiadas, charlas informativas, propostas familiares e un espectáculo nocturno de videomapping. Destacou que a afluencia superou amplamente as expectativas iniciais, ao punto de que foi necesario habilitar novos grupos de visitas guiadas ante o elevado número de persoas interesadas. “Nas visitas tivemos case catro veces máis asistentes dos previstos inicialmente, o que nos obrigou a reorganizar os grupos para dar resposta”, sinalou.

Ao longo do sábado celebráronse tres charlas informativas sobre os traballos realizados e a presentación dos novos espazos de uso público, así como tres roldas de visitas guiadas polo Xardín Botánico e pola Carballeira, nas que se explicou a súa importancia social, económica, festiva e ambiental para a vila. 

A actividade familiar incluíu unha xincana con busca do tesouro e xogos de trivial relacionados co patrimonio natural do espazo, mentres que a programación cultural se completou coa actuación da Banda de Música de Caldas de Reis no Parque dos Choróns,  na que as cadeiras habilitadas dende o Concello quedaron escasas ante a resposta do público. 

Un dos momentos máis destacados foi o espectáculo nocturno de videomapping, que xerou unha grande expectación e congregou numeroso público. Segundo ou Fariña, o espectáculo audiovisual, de 90 segundos de duración foi unha das principais novidades. “Aínda que ás dez da noite aínda había algo de claridade, ás persoas que o presenciaron chamoulles moito a atención: hai proxeccións no chan e nas copas das árbores, xerando un discurso moi interesante ao tempo que respectuoso coa contorna”, subliñou o nacionalista. 

Xa durante a xornada do domingo, o Concello constatou tamén unha maior afluencia de público no BIC, con moita xente paseando e aproveitando a sinalización con códigos QR, que explican as especies do Botánico, dando información exhaustiva para coñecer máis a contorna.